PHE tui pipe a puak

Nimin chhun dar 12 vel khan Dihmunzawl aṭanga Tuikhuahtlanga tui pump chhohna pipe lian chu Khatla-a flyover bridge bulah a puak a, tui a chhuah nasat avangin step pawh a tichhia.

PHE department hotute hnen aṭanga thu dawn danin, tui pipe puak hi Greater Aizawl Water Supply Scheme (GAWSS) Phase-I pipe tê zawk a ni a; tui pump laklawh laia current a awm loh thut avangin tui pump tawh kîr lehin pipe a táwn puak a ni. GAWSS Phase-I hmanga tui pump-na atan hian pipe pahnih hman a ni.

Pipe puak ta hi kum 1986-a siam a ni a, a hlui tawh avangin vawi eng emaw zat hmun hrang hrangah a puak tawh. Tunah hian AMRUT hnuaiah a vaia thlak tum niin, pipe pawh a lo thleng tawh a, hna thawhna tur sum pawh a awm tawh a ni.

Zawhna chhangin PHE department hotute chuan, "Tui pipe hi puak mah se, GAWSS Phase-II a awm bakah, Phase-I pipe lian zawk a ṭhat avangin mipuite'n harsatna an tawk lo ang," an ti a; pipe chhia chu nizan lamah khan siam zawh theih an inbeisei tih an sawi.