Aizawlah No Vehicle Zone Kalpui leh a ni dawn

Coordination Committee on Traffic Ma­nagement chu nimin khan an chairman Lalcham­liana, Home minister hoin Secretariat conference hall-ah an ṭhukhawm a, kumin Krismas leh kumthar dáwnah Aizawl khawpuiah lirthei tlân phal lohna hmun leh hun siam leh an rél.

Meeting hian Krismas leh kumthar vuakveta Aizawl khawpuia lirthei tlân dan tur an sawiho a; December 23, 24 leh 31-ahte Zodin Square leh Chanmari kâwn inkarah lirthei tlân phal lohna, No Vehicle Zone siam an rél a ni. Hunpui laia veng, pawl leh kohhrante chu programme an buatsaih ṭhinah lirthei tlân leh mipui veivâk tibuai lo zawnga siam ṭhin tura beisei an nih thu an tarlang bawk.

Home Minister chuan, traffic management chungchangah member-te infinchhuah tlang zel ṭhin turin a sáwm a; co-chairman TJ Lalnuntluanga, Transport minister chuan, sorkar laipuiin Motor Vehicle Act a duan thar chu Mizoram mipui tana phurrit ni lo tur leh mipui tlin tawk mila siam danglam turin hmalak mek a nih thu a sawi.