Tourism department-in kût buatsaihna atan Kum 7 chhungin cheng nuai 339.15 a hmu

Tourism department chuan kum sarih chhung, 2010-11 aṭanga 2016-17 chhungin kût (festival) buatsaih nan sorkar laipui aṭangin cheng nuai 339.15 an hmu a; tun hma deuhin kum khatah kût pali buatsaih ṭhin mah se, sum indaih lohna vangin tunah chuan kum khatah pahnih chiah an buatsaih ṭhin tawh.

RTI Act hmanga zawhna Tourism department-in a chhan danin, Tourism department-in kût buatsaihna atana sorkar laipui aṭanga kum 2010 hnu lama sum an dawn dan chu - kum 2010-11 ah Rs. 50,00,000, kum 2011-12 ah Rs. 50,00,000, kum 2012-13 ah Rs. 49,15,000, kum 2013-14 ah Rs. 40,00,000, kum 2014-15 ah Rs. 50,00,000, kum 2015-16 ah Rs. 50,00,000 leh sorkar kum kal mek 2016-17 ah Rs. 50,00,000 a ni.

Tourism department SPIO chuan, kum tina an sum hmuh ang ang chu ṭangkai takin a hmanna turah hman ral ṭhin a nih thu a tarlang a, "Tourism promote nan leh khualzin - foreigner leh domestic-te hîp nan festival hi buatsaih ṭhin a ni. Festival hi a hlawhtling thawkhatin kan hria," a ti.

Sorkar laipuiin Tourism depart­ment chu kum khatah kût buatsaih zat tur bituk a neih leh neih loh zawhna chu SPIO chuan, sorkar laipuiin hman tur zat bituk a neih loh thuin a chhang a; tun hma deuhin kum khatah kût pali buatsaih ṭhin mah se, tunah chuan kût pahnih - Anthu­rium Festival leh Ṭhalfavang Kût chiah an buatsaih tawh thu a tarlang.

Tourism SPIO tarlan danin, Tourism department hian tun hma deuha kum khata kût pali a buatsaih ṭhinte chu - Khodou Festival, Chapchar Kut, Lyuva Khutla leh Hnam Kûtpui-te a ni a; heng kût palite hi Central aṭanga sum hmuhin a daih tawh loh avangin an buatsaih thei tawh lo a ni.

Zawhna chhangin SPIO chuan, "Kût (festival) hi a thar emaw, a hlui hmânlaia mi emaw, hman tur tih engmah a awm chuang lo a, sum a awm chuan kût thar pawh buatsaih theih a ni a, hmânlai kût hman ṭhin pawh tharthawh theih lohna tur a awm lo," a ti a; hetih lai hian, Tourism department-in Páwl Kût hman tumna a la neih loh thu a tarlang.