Dampa Group YMA-in Bru kîr duh lote hun pe nawn dawn lo

Dampa Group YMA chuan, sorkarin Bru raltlante hruai kìr a tum mekah Bru-te an rawn kîr duh lo a nih chuan, tun hnu zelah chuan an group huam chhungah an kîr an remtih tawh dawn loh thu an tarlang.

Dampa Group YMA resolution chuan, mahni duhthu ngeia Mizoram chhuahsantu Bru-te Mizorama an rawn kìr theihna tura sorkarin ruahmanna a siam mek chu an thlàwp thu a tarlang a ni.

Dampa group huam chhunga Bru kîrte awm lehna turah felfai takin sorkarah an thlen tawh thu sawiin, Dampa group YMA chuan, "Heti chung pawha lo let duh lote chu Dampa group huam chhung khua - West Phaileng, New West Phaileng, Chhippui, Tuirum, Khawhnai, Teirei Forest, Damparengpui leh Tuipuibari-ahte tun hnuah chuan an rawn kîr kan remti tawh lo ang," an ti.