MPC ṭhalaiin kawng siam dan ringhlel

MPC party ṭhalaite chuan, Ramrikawn aṭanga Sakawrtuichhun khaw chhung thleng kawng blacktop tur, Sakawrtuichhun thleng loa Central Jail péng thleng chauh thawh a ni chu hriatthiam harsat an tih thu sawiin, thil dik lo inthup a awm ngeia a lan thu an tarlang.

MPCY chuan, PWD Road North Division-III ten Ramrikawn-Sakawrtuichhun kawng siam chu December 17, 2016 khan an enfiah tih sawiin, "Cheng nuai 10 man, nikum ṭhál lai
aṭanga thawh tawh chu Sakawrtui-chhun khaw chhung thleng loin Central Jail pêng thleng chauh thawh a ni hi hriatthiam harsa kan ti. Sakawrtuichhun khaw mipuite lu a hai hle a, an khaw chhung thleng blacktop tur hlamchhiaha mawhphurtute hi kan dem tak zet a, an chungah action la ngei turin Mizoram sorkar kan phût a ni," an ti.

MPCY chuan, "He hna cheng nuai 10 man ni si, cheng nuai 4 emaw chauh sénga, Central Jail péng thleng chauh hna thawh duh tâwk a, a hmâwr an báwk ta mai hian sumte hi tihchingpen ni ngeiah kan ngai tlat a ni," an ti.

Thil dik lo awm ngeia lang chhui chiang a, Sakawrtuichhun khaw chhung thleng kawng blacktop tura ruahmanna chu a rang thei ang bera tihlawhtling turin PWD changtu chief minister Lal Thanhawla an phût tih an tarlang a ni.