Fire Prevention Week 2017 February 6-11 ah hman a ni dawn

Sub-Committee on Fire Prevention chu nimin khan an chairman Lalrinmawia Ralte, Environment, Forests & Climate Change (EFCC) minister hoin a pisaah an ṭhukhawm a, Fire Prevention Week 2017 chu February 6-11, 2017 chhunga hman an rél.

Meeting-ah hian kum kal taa hma lak tawh dante thlir let a ni a, kangmei ven kawnga district tina hmalakna chu ṭha thawkhawtah an ngai. Fire Prevention Week 2017-ah hian district leh village level-ah Fire Prevention Award sem ṭha tih a ni a, monitoring & evaluation ti tur atan tlawmngai pawl - Central YMA, SENVA, MUP, ASEP, NSS, STAM, AMFU leh Green Mizoram Network-te an ruat.

Awareness campaign chungchangah, kum dang aia uar zawka kalpui ṭha tih a ni a, mipuite kângmei chungchangah an fimkhur zawk theih nan TV-ahte a remchan dan anga sawihona hun hman a, electronic leh print media kaltlanga a zau thei ang bera kângmei vèn chungchang puanzar, college hrang hrangah NSS-te huaihawta seminar neih, district tin DC-te'n video conferencing hmanga mipui zirtirna pek, YMA group khawmpui kaltlanga Mizoram hmun hrang hranga zau zawka puandarhte an rawt bawk.

Forest Survey of India tarlan danin, February aṭanga May 2015 inkar chhungin Mizoramah ram kâng hmun 2,468-ah a awm laiin, kuminah hian hmun 1,626-ah a awm a, ram kang zau zawng chu hectare 4547.45 a ni.

Sub-Committee on Fire Prevention thurèl leh rawtna hrang hrangte hi Chief Minister kaihhruai State Level Fire Prevention Committee -ah thlirho leh a ni ang.