Rangkachak tawlhrûk thubuaiah chargesheet thehluh a la ni lo

December 14, 2015 zana Aizawl dái, Zampuimanga lungphun bula rangkachak tawlhrûk man thubuaiah nimin thleng khan thubuai chhuinaa an thil hmuh chhuah tarlanna (chargesheet) Court-ah thehluh a la ni lo.

Thu dawn danin, thubuai chhui tura din Mizoram police-a Special Investigation Team (SIT)-te chuan thubuai an chhui zo thawkhat tawh a, mahse, mobile phone-a aṭanga an thil hriat duhte an la hre thei lo. SIT hian he thubuai kaihhnawiha mobile phone an mante chu Tripura-a Forensic Science Laboratory-ah endik turin an thawn a, report an la dawng lo.

SIT hian chargesheet tur an duang mek a, Forensic Science Laboratory aṭanga thil hriat duh an neihte an dawn kim hunah chargesheet theh-luh thuai an tum a ni.

Hetih lai hian, thubuai chhui tura Mizoram sorkar-in an ngen Central Bureau of Investigation chuan he thu ziah lai thleng hian an chhui dawn leh dawn loh Mizoram sorkar an la rawn hriattir lo nia thu dawn a ni. He thubuai kaihhnawihah SIT chuan mi 14 an man a, mahse, an vaiin Court-in bail-in a chhuah vek tawh a ni.