Larsapin Siaha leh Chawngte a tlawh

Governor PS Sreedhan Pillai chuan Nilaini leh nimin khan Siaha, Lawngtlai leh Chawngte a tlawh. Larsap hian Nilaini khan Lawngtlai a tlawh hnuah Siaha a pan a, Siahaah a riak.

Siahaah hian Larsap hi MADC chief executive member N Zakhai hoin sorkar hotute'n an lo dawngsawng a; amah lawmna inkhawmah Governor chuan, Marate'n hmasanga an khualṭhate an lo hmuah ṭhin anga an hnam ziaráng pholang chunga ropui taka an lo hmuak chu lawmawm a tih thu sawiin, "Siaha boruak chauh a thiang lo, a mi chengte rilru pawh a thianghlim ngei ka ring. Democracy ram kan nih angin, mipui duh dan hi a lal ber tur a ni a, mipui tana ṭha tur thil hi kan dah pawimawh hmasa ber fo tur a ni," a ti.

PS Sreedhan Pillai chuan, mipuite chu political party hrang hranga awm an nih avangin politics khelh dan leh kalpui dan a danglam tur thu sawiin, "Political party reng rengin tum thuhmun an nei ṭheuh a, chu chu mipui rawngbawl a ni. Politics hmanga hmasawnna rahbi kan tuk lai hian tumah kan thlauhthlak leh kan tlansan a thiang lo," a ti a; hmasawnna chu mi tin huapzo leh rualkhai a ni tur a nih thu a sawi.

British awpbehna ngháwngkawl aṭanga India a tâl chhuahna chu kum 70 chuang ni tawh mahse, India hnampa Mahatma Gandhi-a'n zalenna tluantling a tih chu - India rama mi tê ber pawhin ni tin ei leh in, sil leh fên lungkham loa a awm hun a nih thu sawiin Larsap chuan, "India ram hi hmasang aṭanga sakhaw intluktlànna leh zalenna, chi tin, hnam tin leh ṭawng tin tual lênna ram a ni. MADC huam chhungah ngei pawh hian mi tinin 'Unity in Diversity' rau i chhawm nung zel ang u," a ti. Larsap hian Siaha District Hospital a tlawh a, damlote Krismas thilpek a hlan a ni.

Governor hian nimin khan Chawngte a tlawh bawk a, Tuichawng bialtu MLA Dr BD Chakma, CADC CEM Rasik Mohan Chakma, Lawngtlai DC Shashanka Ala leh SP Amit Goel-te'n an lo dawngsawng. Chawngtea CADC Rest House tuala amah lawmna inkhawmah Larsap chuan, India rama hmun kilkhawr berte zinga mi CADC tlawh theia a awm chu lawmawm a tih thu a sawi a, "India mi tawh phawt chuan ram danpui hnuaiah dikna chanvo inang tlang vek kan nei a, hmun kilkhawr bera mi pawhin khawpuia mite ang bawkin hriselna, zirna, inkalpawhna leh inbiakpawhna ṭha kan phu vek a ni," a ti. Governor hian CADC hotu te, tlawm­ngai pawl hruaitute leh political party hrang hrang hruaitute a kâwm bawk.