Mizorama tourism conclave neih turah Minister-in NITI Aayog Member a kàwm

Nimin khan Tourism minister Lalnghinglova Hmar chuan Mizorama tourism conclave neih tur chungchangah NITI Aayog member Dr VK Paul chu Delh-ah a kawm. Dr VK Paul hi ITDC leh NITI Aayog hnuaia Tourism Wing aiawhte'n an ṭawiawm.

Lalnghinglova Hmar tunhnai kum hnih chhungin Mizoram tlawhtu nasa takin an pung tih sawiin, "September 2025-a Sairang thleng rel a luh hnuah phei chuan beisei phak bakin khualzin an rawn pung. Tunah chuan Guwahati aṭangin tlai khat thilthuah Aizawl a thlen theih tawh. Thlawhna leh rel a inkalpawhna a awlsam tawh avangin Mizoram tlawhtu an pun zel kan ring," a ti.

Mizoram rawn tlawhtute lo dawnsawn dan tur te, an thlenna leh ei leh in chungchanga lo inbuatsaihte leh an en tur leh tihtur lo siamsak chungchangah te hmalakna tur tamtak a la awm tih sawiin Tourism Minister chuan, "Theihtawp chhuah mah ila keini chuan thlen tâwp chin kan nei," a ti a, NITI Aayog chu rem ruat pui a, hma lak pui turin a sawm.

Tourism Minister chuan Mizoram mawina chu infrastructure ropui ni loin, khuarel mawina a nih thu sawiin, tlang leh ruam, lui leh dil mawi tak takte tichhe si loa tourist hipna’n tihhmasawn an duh thu Dr VK Paul hi a hrilh.

NITI Aayog member Dr VK Paul chuan Mizoram chu tunhnaiah 100% literacy rate nei thei, state ralmuang leh tlawh chakawm a nih thu sawiin, "Tourism conclave hi Mizoram ṭhatna leh mawinate phochhuahna remchang a ni ang," a ti a, a ṭulna apiangah Mizoram sorkar pui tura NITI Aayog a inhawn thu a sawi.

Dr VK Paul chuan Mizoram tlawhtute bakah state mipui kaihhruaina’n Tourism Policy mumal tak buatsaih thuai ṭul a tih Lalnghinglova Hmar hi a hrilh.

Inkawmnaah hian Mizoram Tourism Conclave chu Aizawl emaw, a bulhnaiah hman nise tiin a rel a, a hun atan kum chanve hnulam, boruak nawm lai ni se tih a ni. International Tourism Mart emaw, Mizorama kût awmsa nen kaihkawpa lian leh zau zawka hman dan ngaihtuah ṭha tih a ni.

Mizoram Tourism Conclave buatsaih tur chungchanga inpuahchahna’n, kumin kum chanve hmalamah New Delhi-ah kokim zawka meeting neih leh ngei nise tiin rel a ni. Hetah hian sorkar mi pawimawh bakah Delhi-a tourism kaihhnawih pawl pawimawh hrang hrangte sawm nise, NITI Aayog in hma lo la se, an ti. Mizorama a taka tourism kaihhnawih eizawnna kalpuitute aiawh sawm tel tura tih a ni.