KHAWTHLIR

Thisen pe

Young Chakma Association, Chawngte Branch chuan nimin khan Lunglei Civil Hospital tan thisen unit 11 an pe.

Minister-in kawm

Sports & Youth Services minister Lalnghinglova Hmar chuan nimin khan Delhi-ah Ministry of Youth Affairs & Sports secretary Hari Ranjan Rao a kawm a, sports-a Mizorama hmalakna tur hrang hrangte an sawi dun.

Bial Inkhawmpui

UPC North East India hnuaia Aizawl East District, North Mizoram District leh Lunglei District chhunga pastor bial hrang hrangah nizan aṭang khan Bial Inkhawmpui neih ṭan a ni a, vawiin hian rorel inkhawm neih tur niin, naktuk Pathianni zanah a ṭiak ang. General leh district hruaitute chuan an remchan dan angin bial hrang hrangah inkhawmpui hi an hmanpui dawn a ni.

MPCC-in ngen

MPCC Vigilance department chuan nimin khan Chief Minister hnenah kum 2023 inthlan hmaa an intiam anga CBI-te general consent pe tur leh Lengpui Airport bul ram leinaa manṭang eitute puangzar turin ziakin an ngen.

CM kawm

Nimin khan State Day of Prayers Committee-te chuan an patron Lalduhoma, chief minister a pisaah an kawm a, kumina State Day of Prayers hmang tura an inbuatsaihnate an hrilhfiah. State Day of Prayers hi politics emaw eng party emaw hmalakna ni loin, ram pum huapa ṭawngṭaina ni anga kalpui a nih thu an sawi. Nikum khan State Day of Prayers hi Mizorama khaw 108 ah hman a ni a, state pawna khaw 4 in an lo hmang ve bawk. Kuminah hian Mizoram khua zawng zawngah lehkha thawn chhuah vek an tum a ni.

CSR sawiho

Nimin khan Mizoram CSR Cell-te chu an chairman TBC Lalvenchhunga, adviser to CM hoin a pisaah an ṭhukhawm. Ṭhutkhawmah Mizoram CSR Connect Portal, January 27, 2026-a Chief Minister-in a hawn tak thlirletin, hmalak zui zelna tur an sawiho. All India Society for Electronics & Computer Technology (AISECT) ten Mizorama Centre of Excellence for IT/ITeS leh Digital University din an dilna chungchang an sawiho nghal.