Aizawlah Red Fest buatsaih a ni: HIV do kawngah ṭanrual a pawimawh - Health Minister

Health & Family Welfare minister Lalrinpuii chuan nimin khan LPS Arena, Falkland-ah ṭhalaite hnenah HIV/AIDS chungchang zirtirna tur atana Mizoram State AIDS Control Society (MSACS) leh National AIDS Control Organization (NACO) ṭangkawp buatsaih 'North-East Multimedia Campaign (Red Fest)' a hawng.

Lalrinpuii chuan, ṭhalaite tana HIV/AIDS laka inven dan inzirtirna program pawimawh tak buatsaih a ni chu lawmawm a tih thu a sawi a, "He Red Fest-in a tum chu HIV laka kan him leh him loh hriatchian nana in test a ni a, Mizoram chu India rama HIV vei tamna ber state kan ni hi a pawi tak zet a, HIV do kawngah kan ṭanrual a pawimawh," a ti.

Vanduaia thilthuah HIV hi vei theih a nih thu sawiin Health Minister chuan, "Rin loh deuh deuhte zingah HIV vei an awm ṭhin avangin mahni dinhmun hriatchian (know your status) a pawimawh a, kan dinhmun hriat a ngai a, vanduai thil thuah HIV kan lo vei theih avangin test vek turin a bikin ṭhalaite ka sawm che u a ni," a ti a, know your status chu a pawimawh thu a sawi.

Health Minister chuan Mizorama HIV vei zinga 60% chu mipat hmeichhiatna avanga kai an nih thu sawiin, ṭhalaite chu an nun uluk turin a chah a, "HIV laka inven dan ABC approach hi kan zawm ngei a ṭul. Approach ṭha ber ‘A’ chu abstinence (mipat-hmeichhiatna laka fihlim) a ni a, ‘B’ chu Be faithful (kawppui pakhat laka rinawm) niin, ‘C’ chu loh theih loh a nih chuan condom hman tur tihna a ni," a ti.

Inkhawm kaihruaitu chief secretary Khilli Ram Meena chuan hmarchhak state-ten HIV do kawnga thawhhona ṭha tak an nei chu a lawmthu a sawi a, "In enhran leh indiriam hlauhna avanga HIV in test ngam lote an awm ṭhin a, a pawi takzet," a ti a, mipuite chu HIV hrik paite hi endawng loa, mi pangngai tho an ni tih hre reng turin a chah.

Health secretary K Lalrinzuali pawhin thu sawiin, state danga State AIDS Control Society Project Director-te leh NACO aiawhte hnenah memento a hlan nghal a ni.

Red Fest hi kum 2018 aṭanga buatsaih ṭan niin, Nagaland-ah neih hmasak ber a ni a, kum tin state hrang hrangah neih ṭhin a ni. Kumin hi Mizoramin a thlen ṭum khatna a ni.

North East Red Fest-in a tum ber chu ṭhalaite hnenah HIV/AIDS chungchang zirtir niin, hmarchhak state pariat - Arunachal Pradesh, Assam, Meghalaya, Manipur, Mizoram, Nagaland, Sikkim leh Tripura aṭangin rimawi hmanga HIV/AIDS Awareness neih a ni.

State hrang hrang aṭangin stall buatsaih a ni a, heng stall-ahte hian state tin aṭanga State AIDS Control Society-te’n HIV chungchang zirtirna hmanraw hrang hrang an pho chhuak.