Kut hnathawktute tan kâwl a êng mek - Horticulture Minister

Horticulture minister C Lalsawivunga chuan nimin khan Mamit Horticulture Complex-a 'Collection Centre cum Warehouse' a hawng. Minister chuan, ruahmanna felfai tak hnuaiah sawhthing lei mek niin, kut hnathawktute tan kâwl a êng chho mek zel tih a sawi.

C Lalsawivunga chuan, Mamit khua leh a chhehvel tana collection centre leh warehouse bakah training-na atana ṭangkai tur hawn a ni chu a lawmthu a sawi a, "A huam pawh a zau hle dawn. Kalphung thar mipui sorkarah kum hnih chuang awrhah kan Chief Minister zahawm tak hmalakna zarah hmasawnna hmel lawmawm tak tak kan hmu chho mek zel. Ruahmanna felfai tak hnuaiah sawhthing lei mek niin, kut hnathawktute tan kâwl a êng chho mek zel a ni," a ti.

Horticulture department hnuaiah kut thnathawktute hmasawnna turin nasa taka hmalak a nih thu C Lalsawivunga chuan a sawi a, "Hmarcha, aieng leh sawhthingte khawvel hriata thar chhuah leh hralh tham thar turin ṭan kan lak a ngai a, khawchhakah sapthei beihpui thlak tum niin chhungkaw engemaw zat thlan an ni dawn. Sorkarin theihtawpin kut hnathawktute tan hma a lak rualin, a kut hnathawktute'n engnge kan tih ve tur kan tih chuan dik tak leh rinawm taka hna kan thawh a ngai," a ti a, sorkar kaltlanga hmalakna leh puihna an dawnah taima leh phûr taka hmala turin kut hnathawktute a chah.

Mamit Horticulture Collection Centre cum Warehouse hi NABARD loan 95% leh state share 5% aṭangin Rs 1,67,33,000 senga sak a ni.

Horticulture Minister hian Horticulture department enkawlna hnuaia Lengpuia Mizoram Bamboo Centre, Common Facility Centre for Bamboo tlawhin, rua leh mau hman ṭangkaina tura sawngbawlna hmunte a tlawh. Official-te nen hmachhawp leh hmalaknate an sawiho bakah, Hi-Tech Bamboo Nursery tlawhin, nursery-ah hian rawṭhing, rawnal, rawmi leh phungki rua ṭiakte a awm a, hengte hi mau chîngtute hnena pek tur an ni.