Pharmacy zir chhuakte thlah an ni

Laithangpuii College of Pharmacy chuan nimin khan MFM Complex, Durtlangah 10th Graduation Ceremony an hmang a; adviser to CM TBC Lalvenchhunga, MLA-in hmanpuiin, an thiamna leh theihnate mipui tana hmang a, midang tan nun tam nei ṭheuh turin damdawi lam thiam (pharmacist)-te a chah.

TBC Lalvenchhunga chuan, mahni dikna leh chanvo an ngaih pawimawh ang chiaha an mamawhpurhna neihte ngai pawimawh turin kalkhawmte a chah a, "Tunlai khawvel AI-in min thuam tawhna hmunah hian kan thiamnate ṭangkai zawk leh hlu zawka kan hman chhuah theihna turin uluk tak leh ṭhahnem ngai takin vawiina graduate tharte hian thawk ula, in thiamna leh theihnate hi mipui tana hmangin, midang tan nun tam nei ṭheuh ang che u," a ti.

Mizoram sorkar chuan healthcare industry-te theihtawpin a thuam chak tih sawiin TBC Lalvenchhunga chuan, "Hmalak zel a nih avangin pharmacy graduate tharte leh la zir mekte chuan hma hun êng tak an nei," a ti bawk

Graduation Ceremony-ah hian khualzahawm C Ram-dinmawii'n pharmacy zir chhuak tharte thutiam a lak tir a; MFM executive director Lalramchhuanzela leh Laithangpuii College of Pharmacy principal Lalchhuanmawii ten thu an sawi. Pharmacy zirlai 57 zinga 54-ten hlawhtlinna changin, distinction-ah zirlai 19 leh first division-ah 35 an pass a, pass percentage hi 94.7% a ni.

Laithangpuii College of Pharmacy hi kum 2014 a din niin, Pharmacy Council of India hnuai affiliated a ni a, zirlai 417-in D.Pharm an zir chhuak tawh a, tunah hian zirlai 120 an awm mek.