Thluak ti chak turin exam a pawimawh - Education Minister

Nimin khan Govt Mizo High School Multipurpose Hall-ah Prime Minister Programme Pariksha Pe Charcha 2026 chu live-a thlirho a ni a, Education minister Dr Vanlalthlana chuan thluak ti chak turin exam a pawimawh thu a sawi.

Education Minister chuan exam lai hian pressure a san ṭhin avang leh chu chuan zirlai tam takah harsatna a siam ṭhin avangin Psychologist Association-te nen ṭanghoin helpline siam tum a nih thu sawiin, "Tihhlawhtlin theih a nih chuan zirlai tam tak tan a ṭangkai ka beisei," a ti.

Exam hmachhawn hi thil peihawm loh tak ni mah se, puitlinna kawng zawh nan paltlang a ngai tih sawiin Dr Vanlalthlana chuan, "Harsatna paltlang hian chakna min pe a, exam hian chakna min pe ṭhin a ni. Kan thluak hi kan hman tam zawh pauh leh a chak," a ti a, thluak tihchak turin exam a pawimawh thu a sawi.

Pariksha Pe Charcha 2026-ah hian prime minister Narendra Modi chuan Delhi-ah state tin aṭanga zirlai thlan chhuah kalkhawmte chu kawmin, exam hmachhawn dan turte leh zirlaite zirna atana tangkai tur thil chi hrang hrang a sawipui. Mizoram atang pawhin Lalthlamuanpuii PM Shri KV School, Aizawla class XII zirlai a tel.