CM Rubber Mission a hlawhchham thiang lo - LRSWC Minister

Land Resources, Soil & Water Conservation (LRSWC) department hmalakna Chief Minister's Rubber Mission hnuaia ṭhelret (rubber) chingtu leh ching turte tan nimin khan Lunglei Convention Centre-ah rubber chin, enkawl, hnai leh sawngbawl dan zirhona buatsaih a ni a, LRSWC minister Lalthansanga'n a hmanpui a, CM Rubber Mission chu a hlawhchham thian loh thu a sawi.

Lalthansanga chuan ram mipuite'n mahni kutkea din theihna tura ke penpui thei tur sorkar an mamawh tih sawiin, "Tuna Mizoram sorkar hian mipui mamawh chhanna ni turin theihtawpin hma a la mek. CM Rubber Mission hi Chief Minister kaihhruaina hnuaia sorkar hotulu ber aṭanga department zawng zawng tela kut hnathawktute tana hmalakna a nih avangin a namai loin, a hlawhchham thiang lo. Takna nena beih a, tihpuitlin ngei ngei a ngai," a ti.

Rubber chingtute chu kum 4 chhung enkawl zuipui an nih tur thu leh thiamna sang zawk nen sorkarin a enkawlpui tur thu sawiin LRSWC Minister chuan, "CM Rubber Mission hnuaiah hectare 11,500-a zauva hma lak tum a nih laiin phase I & II-ah hectare 3,575 chuang awrhah chauh kalpui a la nih avangin ching duhte tan kawng a la inhawng zau," a ti a, phase-III & phase-IV a la awm zel dawn thu a sawi.

LRSWC Minister chuan rubber chu a hnai chhuah ṭhat hun zing dar 3 vel aṭanga zing dar 7 vel inkara hnai ngai a nih thu sawiin, "A chin chungchang bakah a hnai danah taimak a ngai. Mihring tluk deuhthawa duat leh dimdawi taka enkawl ngai a nih avangin a enkawl dan hre chiang tura training a pawimawh. A ching turte chuan tuipui zawl (sea level) aṭanga teha metre 500 aia sang lovah a hlawk," a ti.

Khualzahawm, Lunglei South bialtu MLA Lalramliana Papuia chuan Mizoram sorkar hmachhawp hrang hrang zingah CM Rubber Mission chu Chief Minister leh a changtu minister-in an tuipui tlat a nih thu sawiin, "Ram tan hmasawnna nasa tak thlentu tura beisei a ni," a ti a, phase-I & phase-II kalpui tawhah Lunglei district-ah ram hectare 370-a zauah a chingtu 300 vel an awm tawh thu a sawi.

Zirhonaah hian Mizoram chhim lam district pali - Lunglei, Siaha, Lawngtlai leh Hnahthial aṭangin rubber ching mekte leh la ching tur mi 200 koh an ni. CM Rubber Mission Phase-II hnuaiah hian rubber chinna atan Lunglei district-ah ram hectare 370-a zau, Hnahthial district-ah hectare 80, Lawngtlai district-ah hectare 80 leh Siaha district-ah hectare 20-a zau te ruahman a ni.

Lunglei District-ah rubber chinga buaipuitu kut hna thawktu 300 chuang awm mekin, kum khatah quintal 1,000 dawn an thar chhuak tawh. A hralhnaah buaina awm lovin, an huanah ngei an hralh thei reng. MIRSAC data aṭanga a lan danin, Lunglei district-ah hian rubber chin theihna hmun (potential area) - class 1 square kilometre 1,033.23-a zau leh class 2 square kilometre 640.39-a zau a awm.