Larsap hoin Ex-Servicemen Rally neih a ni

February 7, Inrinni khan Lammualah sipai bángte intawhkhawmna, State Level Ex-Servicemen Rally hman a ni a, Governor Gen. Dr Vijay Kumar Singh-a'n hmanpuiin, sipai báng chhungte hnenah ṭanpuina leh chawimawina a hlan.

Larsap chuan, Mizoram Ex-Servicemen League (MESL) member-te chu India rama ex-servicemen a hmuh tawh zinga inchei nalh leh zahawm ber an nih thu sawiin, "Ex-servicemen-te inchei dan tura mawi leh entawn tlak a ni. Mizo mipui leh sipai inkarah muanna, remna leh inzah tawnna a awm a, mipui leh sipaite'n inlaichinna ṭha tak an nei," a ti a; Rally chu inzah tawnna, inrinngamna, thawhhona leh induhsak tawnna lantirna a nih thu a sawi.

Sipai bángte nunah mahni inphatna leh inpumpekna entirnate a taka hmuh theihin a awm tih sawiin Gen. VK Singh chuan, "An service chhungin chhungkaw bulah awm loin, hmun hrehawm tak takahte an awm kual a, anmahni avangin kan him ṭhin," a ti.

Governor chuan, sipai, an ṭhat lai hun tam zawk ram tana hlantute leh an chhungte puala medical camp buatsaih a ni leh pension, hamṭhatna leh chhawmdawlna an dawn chungchanga vuivaina thlenna tur Grievance Redressal Cell siam a ni hi lawmawm a tih thu a sawi a; Mizoram sorkarin sipai bangte leh an chhungte hamṭhatna a ngaih pawimawh thu a sawi bawk.

Home minister K Sapdanga pawhin thu sawiin, ram tana an ṭhat lai hun tam zawk hmang a, hmun rálṭî leh hrehawm tak taka awm ṭhinte chu ngaihsan tur an nih thu a sawi a, "Duty an dah pawimawh hmasa tlat ṭhin hi an fakawm a, Mizoram mipuiin ex-servicemen-te inpekna an hre reng tawh dawn. Khua leh tui entawn tlak an ni chhunzawm zel," a ti.

Home Minister chuan sipai bangte chu Mizo ṭhalaite fuih phûrtu leh entawn ni zel turin a chah a; an hnen aṭanga inzir a, ram leh hnam tana mi ṭangkai nih tum ṭheuh turin ṭhalaite a chah bawk.

Ex-Servicemen Rally-ah hian MESL president Lt Col. Clement Lalhmingthanga, MLA, Indian Army 3 Corps (Spear Corps) commander Lt Gen. Abhijit S Pendharkar leh Assam Rifles inspector general (East) Maj. Gen. Inderjit Singh Bhinder te pawhin thu an sawi. Governor hian rally puala stall siamte a tlawh kual a ni.

Inkhawmah hian sipai báng pakua, sipai huaisen chawimawina dawng chhungte leh ram tana nun hlantu sipai nupui (Veer Nari) mi pangate hnenah chawimawina leh ṭanpuina hlan a ni.

Chawimawina leh ṭanpuina dawngtute chu - Hav. Lalbiakthanga Pachuau (Padma Shri), Saihmingliana Sailo f/o Capt. Lalrinawma Sailo (Kirti Chakra), Hony Capt. Lalhuapzaua (ESM), Sub. Laltana (ESM), Sub. Sangchhunga (ESM), Hav. Lawmthanga (ESM), Nk Ramfangzauva (ESM), Nk Lalthankama (ESM), Sep. S Vanlaltana (ESM), Sep. Selkhuma (ESM), Belsangi (Veer Nari) w/o Nb Sub. Laldalliana, Tlangkhumi (Veer Nari) w/o Sep. Kawlnithanga, Zohmingliani (Veer Nari) w/o Nk Lalngaihzuala, R Lalṭhakimi (Veer Nari) w/o Nk Lalchhuanawma leh Vanlalrengi (Veer Nari) w/o Sep. H Lalnunthara te an ni.