KHAWTHLIR

Thisen pe

Chanmari West Branch YMA chuan February 7, Inrinni khan an hmunah thisen pek an huaihawt a, Civil Hospital, Aizawl tan thisen unit 85 an pe a, petute mipa 66 leh hmeichhia 19 an ni. KṬP, Chanmari Branch pawhin Inrinni vêk khan Synod Hospital tan unit 52 an pe a, petute mipa 44 leh hmeichhia pariat an ni.

March 2026-a zo turin contractor hrilh

Mizoram State Project Monitoring Committee hnuaia inspection team chuan February 6, 2026 khan North Vanlaiphai Water Supply Scheme siam mek an endik. North Vanlaiphai Water Supply Scheme hi ni khatah darkar 16 chhung tui litre nuai 9 pump thei tura ruahman a ni a, siam zawh hun tura hun bituk a pêl tawh. Inspection team chuan, mipui mamawhna hriaa March 2026 chhung ngeia zo hman turin contractor an hrilh a ni.

Drugs free campaign

Siaha District Level Nasha Mukt Bharat Abhiyaan (NMBA) Committee-in a rel angin, February 7, Inrinni khan district NMBA member-te chuan Siaha district chhunga Myanmar ramri hrul khuate an tlawh a, ruihhlo ṭhat lohzia inzirtirna (drugs free India campaing) an nei. Tipa leh Siaha BDO-te'n ruahmanna an siam angin khawtlang hruaitute'n an lo dawngsawng a, mipui koh khawmna tur hmunhma an lo ruahmansak a ni.

Alu chi sem

Adviser to chief minister (technical) H Ginzalala, Champhai North bialtu MLA chuan February 7, Inrinni khan Khawzawl Krishi Vigyan Kendra (KVK) training hall-ah Indian Agricultural Research Institute (IARI) NEH Scheme kaltlangin Champhai leh Khawzawl district chhunga Neihdawn, Vanchengpui, Zotlang, Tuimuk, Biate leh Tualpui khuaa kut hnathawktute hnenah alu (var kufri jyoti) chi quintal 50 a sem. KVK, Khawzawl mithiamten alu chìn leh enkawl dan an zirtir nghal a ni.

KL Rochama vui liam a ni

MLA hlui KL Rochama (88), Tuikhuahtlang chu nimin zing dar 1 khan Ebenezer Medical Center-ah a thi a, nimin khan BCM, Central Church, Aizawl biak-inah vui a ni. KL Rochama hi hun eng emaw chen chanchinbu lama inhmang a ni a, Mizoram union territory-a inthlan hmasa ber kum 1972 khan Lunglei bial aṭangin Mizo Union ticket-in MLA atan thlan tlin a ni. Kum 1978 inthlanah Kolasib bialah leh kum 1979-ah Hnahthial bialah Congress ticket-in a ding a, a tling lo ve ve thung. Hun rei tak chhung Former Legislators Association Mizoramah president a ni.