Manipal Hospitals-in chanchinbumite tan North East Media Conclave an buatsaih

Manipal Hospitals chuan February 5-6, 2026 khan Kolkata-ah North East Media Conclave an buatsaih a, hmarchhak state panga aṭangin chanchinbumi 11 an tel a, Mizoram aṭangin MJA member pathum an tel.

February 5 khan Manipal Hospitals EM Bypass (Medica Superspeciality Hospital ṭhin)-ah inlawmna leh inkawmkhawmna hun hman a ni a, Manipal Hospitals EM Bypass-a hotu lúte leh doctor eng emaw zatin thu an sawi.

Manipal Hospitals hotute chuan, an damdawi-in hrang hrangah India hmarchhak mi 9,200 chuang an enkawl tawh thu an sawi a; hmarchhak state hrang hrangah zûk leh hmuam bakah, ei leh in avangin cancer a tam nia an hriat thu an sawi hlawm.

Manipal Hospitals EM Bypass hotute chuan, inzainaah khawl changkang zawk robotic surgery an tih nasat tawh thu an sawi. Cancer enkawlna lam an ngaih pawimawh thu sawiin, "Cancer/oncology building hranpa liau liau lian tak kan nei," an ti a; lung zai leh enkawl (cardiology), thluak lam (neurology), ruh lam (orthopedic), kal lam (nephrology) chuap lam (pulmonary) leh pum leh ril lamah te doctor ṭha tak tak an neih thu an sawi bawk.

February 5 chawhnu lamah Manipal Hospitals pahnih - EM Bypass leh Mukundapur hmunhmate chipchiar taka fan a ni a; January 6-ah Manipal Hospitals dang pahnih - Broadway leh Salt Lake te tlawh leh a ni.

Manipal Hospitals Broadway hotute chuan, an damdawi-in chu hmarchhak mite'n an pan nasat thu sawiin, "NE mite ei duh zawng a danglam a, an duh ang chaw kan ngaihtuahsak thei," an ti a; an nurse zinga 60% vel chu hmarchhak mi an nih thu an sawi.

Manipal Hospitals hian India rama khawpui 24-ah damdawi-in 49 an nei mek a, an hmunpui chu Bengaluru a ni. Kolkata bikah damdawi-in panga an nei a; chungte chu Medica Superspeciality Hospital tih ṭhin te, AMRI Hospital ṭhin pathumte leh, Columbia Asia Hospital tih ṭhinte a ni. Heng damdawi-inahte hian Mizo nurse eng emaw zat an thawk mek.

Manipal Hospitals NE Media Conclave-a telte hi MJA general secretary K Zothanpara, member dang Vanlalrema Vantawl leh PC Zonuntluangi te an ni.