Ruihhlo do turin huaisen a ngai - CYMA President

Central YMA president R Lalngheta chuan February 7, Inrinni khan Khawkawnah YMA kumpuan 'Ruihhlo Do' a hawng a, ruihhlo do tura huaisen a ngaih thu a sawi.

R Lalngheta chuan ruihhlo do chu mi huat hlawh theihna a nih rualin, kan ram leh hnam tana thil pawimawh tawpkhawk a nih thu a sawi a, "Kan ṭhalaite ruihhlo avanga nunna chan mek chhanchhuak tur hian hruaitute kan huaisen a ngai a ni. Damdawi zuarten an thiltih an zahpui loh chuan, eng vangin nge keini hian do kan zah bik ang? 'Ṭhian chhan thih ngam' kan tih ṭhin hi a taka hman a ngai a, ruihhlo zawrh avanga kan hnam sawptute hi kan sawp let ve a ṭul tak zet a ni," a ti.

Ramria police-te thuam chak a pawimawh thu sawiin CYMA President chuan, "Ramria YMA-te'n duty post an siam hian awmzia a neih tel ka beisei. Thil dik lo titute laka case khauh tak kan siam duh a nih chuan, dan zawm chunga hmalak a pawimawh," a ti a, hnam damna tura chetchhuahna chu Pathian rawngbawlna a nih thu a sawi.

Khawkawn Branch YMA-ah hian tun dinmunah member mipa 346 leh hmeichhia 364, an vaiin 710 an awm mek a ni. Khawkawn khua hi Manipur luh dawn a Mizoram lama khaw tawp ber an nih avangin, ruihhlo do kawngah branch ṭangkai tak leh mawhphurhna lian tak nei an nih thu CYMA chuan an tarlang.