Policy siam dawnah entrepreneur-te telh ve ṭhin turin Mizoram sorkar ngen

Mizoram Entrepre-neurs’ Chamber (MEC) hruaitute chuan nimin khan Aizawl Press Club-ah thuthar thehdarhtute an kâwm a; sorkar department-te'n economic development policy an siam dawnin entrepreneur-te telh ve ṭhin turin Mizoram sorkar an ngen.

MEC hruaitute sawi danin, an pawl hi private sector aṭanga sorkar thâ tichak tura entrepreneur-te'n December 30, 2025-a an din a ni a, kutkawih eizawnna lama inhmang mi 43 an tel. MEC chairman chu Joseph L Ralte niin, secretary chu Dr Vanlalsiama Chhangte a ni.

MEC hruaitute chuan, kutkawih eizawnna (entrepreneurship) chawikan chu ram leh state economy chawikanna atana kawng pawimawh ber a nih thu an sawi a, "Mizoramah pawh sorkarin hma a la mek a, a la zel dawn pawhin a lang. Mizoram sorkar department hnuaia economic development policy leh ruahmanna an siam dawn rêng rêngin entrepreneur-te min telh ve thin turin Mizoram sorkar kan ngen a, hei hian sorkar hmalakna a tihchak kan beisei," an ti.

Mizoram Industrial & Investment Policy 2025 kengkawhtu tur ber Commerce & Industries department chu kum tam tak chhung ngaihthah a nia sawiin MEC hruaitutre chuan, "Commerce & Industries hi hna thawk thei tura restructure a ngai hle. Tuna an kal dan pangngai ngawt lo hian principal director kaihhruaina hnuaiah directorate pathum emawa ṭhen darh ni se," an ti a; chu chu Mizoram tihhmasawnna tura pawimawh hmasa nia an hriat thu an sawi.

Mizo thil siam a to tia sawi ṭhin chungchangah MEC hruaitute chuan, "A chhan ber chu a siamna leh thar chhuahna hmanrua vai ram aṭanga kan lak luh vang a ni ṭhin. Kan ram chhunga mi pawh phurhna man hi a sang hle. Hengah hian Mizoram Industrial & Investment Policy 2025 a pawimawh a, thil ti tak takte’n subsidy chi hrang hrang an claim theih phawt chuan kan thil siam hralhna rate hi vaipa rate nen kan compete thei dawn a ni," an ti.