Kângmei Vên Hapta hawn a ni

Nimin khan Mizoramah Kângmei Vên Hapta hman ṭan a ni a, Environment, Forest & Climate Change (EFCC) minister Lalthansanga'n Administrative Training Institute (ATI) auditorium-ah a hawng a, kumtluana kângmei laka fimkhur nachang hriat reng a ngaih thu a sawi.

EFCC Minister chuan, Kangmei Ven Hapta chu mipuite’n kângmei laka fimkhur nachang an hriat thar lehna tur te, uar lehzuala invenna kalpui a nih theih nantea hmalakna a nih thu a sawi a, "Record-a tarlan a nih danin, Mizoram hi engtik lai pawha ram kâng/kângmei chhuah thut theihna hmun a ni a, kumtluana kângmei laka fimkhur nachang kan hriat reng a ngai," a ti.

Kângmei laka ramngawte veng him tur leh sik leh sa inthlak danglam nasa lutuk tur veng turin mipuite’n inzirtirna an neih nasat a ngaih thu sawiin Ministger chuan, "Khawpuia chengte hi hma la hmasatuah ṭang ila kan duh. Sorkarin media hrang hrang kaltlanga uar lehzuala hmalak zel a tum," a ti a; kângmei vennaa thawk ṭha khuate hnenah lawmman siam a nih leh tur thu a sawi.

Lalthansanga chuan, YMA leh environmental NGO-te'n ramngaw veng him tura an thawhpuinaah a lawm thu sawiin, hun kal zelah pawh thawhhona ṭha tak neihpuiah a sawm a, "Ramngaw tichereu tam lo tura lo neih dan kalphung ṭha lehzual a awm theih nan te, hmasawnna hnathawh leh environment humhalhte pawh inkhuangrual taka kalpui a nih theih nan kan department porohibitory ni loin regulatory kan ni," a ti.

Kangmei Ven Hapta hawnnaah hian sorkar depart-ment hrang hrang aiawh te, environmental NGO leh YMA hruaitute an tel. Principal chief conservator of forest Rajeev Kumar Tiwari-a'n Hapta tum tlangpuite a sawi a; Mizoram Pollution Control Board chairman Liankima Lailung kaihruaiin nungcha leh ramngaw humhalhna thutiam sawi rual a ni.

Fire Prevention Week 2026 hi February 9-13 chhung hman tur a ni a, thupui chu ‘Nungcha tinreng chenna leh tui thianghlim min petu ramngawte kângmei lakah veng him rawh’ tih a ni. Kângmei vennaa hma la ṭha zual khaw pathumte hnenah lawmman hlan an ni dawn a, khaw dang ti ṭha pathumte hnenah consolation prize pek a ni ang.

Huan leh leipui atana mimal ram vâtte chuan March 5, 2026 ral hmain an hâl tur a ni a, khawtlang ṭheh ram lo atana vâtte chuan March 15, 2026 ral hmain an hâl tur a ni thung. Lengpui leh a chhehvela lo hâl turte chuan tlai lama thlawhtheihna thlawk chhuak hnuhnung ber hnuah chauh hâl tur a ni.