KHAWTHLIR

GST Sahyogis training

National Academy of Customs, Indirect Taxes and Narcotics (NACIN), Shillong leh Central Goods & Service Tax Commissionerate, Aizawl chuan nimin khan Aizawla CGST conference hall-ah 'Certificate Course on GST Sahyogis' an buatsaih a, NACIN, Shillong additional director general L Beimopha-in a hawng. Training hi chawlhkar hnih chhung awh tur a ni a, Central GST officer-te leh tualchhung sumdawng pawl hruaitute an tel.

Dawr pahnih kâng

Nimin chawhma dar 10:30 vel khan Bawngkawn Venglaia R Lalawmpuia ina K Vanlalzuala, Ramhlun South leh Lalhriatpuia Khiangte, Falkland Veng ten dawra an luah chu a kâng a, bungraw chuh hman a ni lo. Thu dawn danin, kângmei chhuak hi chhun dar 12 velah ṭhelh mih a ni a; dawr kângte chu plastic bungrua zawhna leh damdawi zawrh niin, cheng nuai 70 hu vel a kâng chhiaa chhût a ni.

Hmasawnna tur MLA sawipui

Nimin zing khan Champhai Circuit House-ah MJA, Champhai District member-te leh MNF senior vice president Dr R Lalthangliana, MLA an inkâwm a; Champhai khawpui hmasawnna tur chi hrang hrang an sawiho a ni.

State Day of Prayer

Serchhip leh Lawngtlaiah nimin khan District Bawrhsap-te kaihhruaiin Mizoram State Day (February 20)-a State Day of Prayer hman dan tur rel a ni a; Serchhip district-ah chuan a hmanna pui ber hi Serchhip khawpuiah neih ni se, khaw tinah he ni hian kohhran tinah zing ṭawngṭai inkhawm thupuia telh ṭheuh tura ngen ni se, an ti. Lawngtlaiah chuan hun hman dan tur duang turin DC kaihhruai Steering Committee an din a ni.

Rev. Lal Rinmawia vawiinah vui dawn

Rev. Lal Rinmawia (88) h/o Zopari, Khatla chu nimin tlai dar 4:14 khan a thi a, vawiin hian an ina thlahna hun hman a nih hnuah chhun dar 1-ah Khatla Kohhran biak-inah vui a ni ang. Rev. Lal Rinmawia hi kum 1997-a Synod inkhawmpuiah moderator a ni.