Hmasawnna aiin kan himna tur buaipui hmasak phawt a ngai - UDPA Minister

Urban Development and Poverty Alleviation minister K Sapdanga chuan, hmasawnna aiin Mizote himna tur buaipui hmasak a ngaih thu a sawi.

Nimina Aizawla ZPM chhung inkhawmah minister K Sapdanga chuan, district headquarters tiamin urban town 28 a awm mek thu a sawi a, "Heng khua zawng zawng hi tlang chhip leh tlang panga awm vek a ni a, kan zavaia buaina chu leimin a ni. Leimin tur laka inven dan ṭha ber chu tui luankawr ṭha tak siam a ni a, development aiin safety kan buaipui hmasak phawt a ngai," a ti.

K Sapdanga chuan, khaw chhung lei che tihdam phawt tum a nih thu sawiin, "Kum kal mekah Storm Drain fund cheng vbc 104 kan pûk a, kum thar atan sum dil belh mek," a ti a; kum thum a liam leh chuan district khawpui leh urban town-te chu siamṭhat theih an inbeisei thu a sawi.

UDPA Minister chuan Thenzawl Peace City chungchang sawiin, "DPR siam mek a ni a, chak taka hna kalpui tum a ni. Aizawl khawpui sawn tumna a ni lo a, Aizawl khawpui tâwt lutuk tihziaawmna tura ruahman a ni a, a thawh khat nan mi nuai khat chen theihna turin ruahman chin phawt a ni,” a ti.

Khawpui chhung kawng siam mek leh Assam Rifles ram chhuahsan chungchang sawiin Sapdanga chuan, "Vantlang tana ṭangkaia siam a ni dawn a, a zau thei ang ber hmun hringa siam kan tum a, a zau thei ang ber kawngpui siam kan tum," a ti a; Lammualah phûl thar ṭha chi phah tum a nih thu leh a ngil thei ang berin kawngpui metre 14-a zau sial tum a nih thu a sawi.

K Sapdanga chuan, Dak Inpui aṭanga Saron Veng panna kawng metre 7-a zau laih tum a nih thu sawiin, "Parking lot lian, motor sang chuang dah theihna tur te, mi 4,000 chuang lenna convention centre tur ruahman mek a ni. Bazar Bungkawnah Aizawl Square (Island) siam tum a ni a, Assam Rifles Mandir pawh zau zawka la hêkin kawng sial a ni ang a, a chungah public park siam tum a ni. heng hmasawnna rulhrel kan din turah hian sorkar thláwpa thawhpui thei tur AMC kan mamawh," a ti.

Khawpui leh khaw kar kawng siam chungchangah UDPA Minister chuan, "Khaw tuihul chhungin kar kawng leh khaw chhung kawng a tam thei ang ber siam kan tum. Kolasib lam changtu NHIDCL pawh chak zawka an thawh theih nan nawr leh an ngai a, Central YMA pawh an tang em em a, a lawmawm hle," a ti a; Aizawl-Thenzawl-Lunglei kawng siam mek zel a nih thu a sawi bawk.