Vety Minister-in ran vulhtute tan insurance tih theihna tur tlangzarh

Animal Husbandry and Veterinary minister C Lalsawivunga chuan nimin khan Planning committee room-ah ran vulhtute'n an rante tana insurance an tih theihna tur 'Animal Insurance' a tlangzarh. Animal insurance atan hian National Insurance Company hotute leh AH & Vety secretary Lalsanglianate'n thawh­hona thuthlung an ziak nghal.

Minister C Lalsawi­vunga chuan, ran vulhtute mamawh em em, ran insurance kalpui tak tak tura hmalak a ni ta chu lawmawm a tih thu a sawi a, "Insurance company tam zawkin animal insurance an tuipui lo. ASF (African Swine Fever) avangin Mizoramah insurance company koh luh an har. Chief Minister-in sorkar laipuiah thlenin, insurance company hrang hrang head office-ah lehkha a thawn avanga tun dinhmun thleng kan ni," a ti.

Mizoram chu vawk­saah a intodelh dawna a lan laiin, kum 2021 aṭanga ASF lêngin nasa takin vawk vulhtute a nuai tih sawiin Minister chuan, "Kha hri lên aṭang khan ngai an awh leh tawh lo. ASF vanga vawk vulhtute sum hloh hi cheng vbc 960 a tling tawh," a ti a, sorkarin animal insurance-ah theihtawp a chhuah thu a sawi.

AH&Vety Minister chuan, animal insurance-a state matching share 30% chu 10%-ah tihhniamsak turin Union Minister-ah a ngen thu a sawi a, "Kan ngenna angin 10%-ah min tihhniamsak. Vawiina insurance tlangzarh tak atan hian central aṭangin cheng nuai 66.49 hmuh a ni a, first instalment chauh niin, first instalment-ah hian ran 4,545 insure tum a ni," a ti.

National Insurance Co. Ltd aṭangin insurance dil dan tur tlangpui leh insurance hmuh theih dante ngaihthlak a ni a; insurance dilna chu state danga thawn ngai loin, Aizawlah chinfel theih a nih tur thu an sawi.

Animal insurance hian ran vulh hrang hrang - vawk, bawng, sial, kel leh beram a huam dawn a, implementing agency atan National Insurance Company thlan a ni. Premium aṭanga 15% chu ran vulhtute'n an tum ve a ngai a, Handholding hnuaia progress partner-te erawh chu sorkarin a tumsak vek dawn thung.

Vawk vulh insure turin vawk pakhatah Rs 2,000 a ngaih laiin, vawk vulhtuin Rs 292 chauh a chawi a ngai dawn tih sorkar thuchhuah chuan a tarlang.