KHAWTHLIR

Thisen pe

Zirtiri Residential Science College NSS leh Red Ribbon Club chuan nimin khan blood donation camp an huaihawt a, Synod Hospital, Durtlang tan thisen unit 22 an pe a, petute mipa 17 leh hmeichhia panga an ni. February 5, 2026 khan Synod Hospital tan vek thisen unit 51 an lo pe tawh bawk.

Hnathawh endik

Mizoram State Project Monitoring Committee (MSPMC) member-te chuan nimin khan Saitual district-a Circuit House, DC bangla leh District Hospital sak mek an endik. MSPMC team hian in sak laite chu an hnathawh chin an endik a, hna thawktute kâwmin, an harsatna tawhte an zawt. Hmanrua endik (test) turte ti a, bungraw chah ngaite a rang lama chah turin an hrilh bawk.

Safety Internet Day

PWD chuan nimin khan PWD Engineer-in-Chief conference hall-ah Safe Internet Day an hmang a, internet leh artificial intelligence him zawka hman dan leh inven dan an zirho. Safer Internet Day hi khawvel pumah February thlaa Thawhlehni vawi hnihnaah kum tin hman ṭhin a ni.

Loan late training

Bána Kaih (Handholding) hnuaiah Prime Minister's Employment Generation Programme (PMEGP) loan late tan nimin khan Multi Disciplinary Training Centre, Zemabawkah Entrepreneurship Development Programme training ṭan a ni a, ni 10 chhung thil pawimawhte inzirtir a ni dawn. Training-ah hian district 10 aṭangin PMEGP loan la mi 82 an tel a ni.

MUP-te'n tlawh

Siaha District Social Welfare pisaa thawkte chuan nimin khan Mizoram Upa Pawl, Siaha Sub-Headquarters-a office bearer leh executive committee member mi 30 chu Charity Home, Serkawr an tlawhpui a, home-a enkawl mekte tan ei leh in tur bakah, thil dang ṭhahnem tak an hlan a ni.