MSACS hmalakna SPOT hawn a ni

Mizoram State AIDS Control Society (MSACS) Safe Place For Open Talk (SPOT) chu February 9, Thawhṭanni khan Health minister Lalrinpuii'n a hawng.

Health Minister chuan, Mizorama HIV vei hmuh chhuah tawh zingah 70%-te'n HIV an kai chhan chu invenna tel loa mipat hmeichhiatna an hman vang a nih thu a sawi a, "Kum 20 leh 35 inkarah kai thar an tam hle. India ramah HIV kai tamna state zinga mi kan ni hi a pawi. Kristian ram kan nih angin kan dinhmun hi a zahthlak a, ṭangruala HIV hi kan do tlan zel a pawimawh," a ti.

MSACS project director Dr Jane Rinsangi Ralte chuan, SPOT buatsaih chhan sawiin, "SPOT hi MSACS hmalakna pawimawh tak a ni a, ṭhalaite'n an vei zawngte zalen taka an sawi theihna atana buatsaih a ni. SPOT hi district dangah pawh hawn belh zel kan tum," a ti a, SPOT chu an buatsaih chhan ang taka ṭhalaite'n an hman ṭangkai a beisei thu a sawi.

SPOT hi ṭhalaite'n inthliarna leh in enhranna awm loa counselling, HIV enfiah, HIV/AIDS laka inven dan a taka inzirtirna an dawn theihna hmun tur a ni a; HIV/AIDS chungchanga harsatna hmachhawn dan te, thuruk an sawi chhuah ngam lohte inhawng taka an sawina hmun tur atana ruahman a ni.