AHP-in ram pe lo turin CM an ngen

Aizawl Hmathlir Pawl (AHP) chuan, Khatlaa Aizawl Lei thlang hmun ruak chu pawl hnenah pe lo tura ngenna nimin khan chief minister Lalduhoma hnenah an thlen.

AHP chuan, Aizawl Lei thlang hmun ruak, lei tlahniam vanga Bible House ṭhiah tawhna lai chu Mizoram sorkarah pawl ṭhenkhatin pisa atan an dil tih hriat a nih thu an tarlang a, "Helai hmun hi Kulikawn leh Chanmari inkara kawngpui sira hmun inhawng (open space) awm chhun ni tawh, taksa sawizawi duhte leh khawthlir duhte tana hmun nuam leh remchang a ni," an ti.

Mi ṭhahnemngai thianho pawlin tlaizawng kung 19, herhse leh phunchawng kung eng emaw zat an phun tawhna a nih thu sawiin AHP chuan, "A puitlin hunah chuan Aizawl timawitu tur a nih bakah, boruak thianghlim pe chhuak tur a la nih dawn avangin, sorkarin tu kutah mah pe lo se, tuna a awm ang hian humhalh tlat ni se," an ti. An rawtna hi Chief Minister pawhin ṭha a tihpui nia an hriat thu an tarlang.