Minister Lalrinpuii'n award a dawng
Achievers’ World leh Indian Achiever Forum te chuan nimin khan Le Meridan Hotel, New Delhi-ah National Summit 2026, Vikshit Bharat 2047 Through Comprehensive Socio-Economic Development Programme an buatsaih a, Health minister Lalrinpuii hnenah Women Icon Award 2026 an hlan.
Lalrinpuii chuan, award a dawn chhan chu - India-in kum 2047-ah ram hmasawn (developed country) nih tuma hma a lakna Viksit Bharat chhunga tehfung pawimawh, healthcare sector lamah, Mizoram Universal Healthcare Scheme ṭha taka a kalpui vang te, thingtlang mite tana ruang phurh man sorkarin a tumsakna an buatsaih vang te, India rama infant mortality rate hniam ber pawl ni tura hma an lakna vang te, Mizoram Health Systems Strengthening Project an kalpui ṭhat vang te, sorkar damdawi-in zingah NQAS certificate hmu an awm belh zel vangte a nih thu a tarlang.
Health Minister chuan, "Department leh sorkar lama ka thawhpuite inpekna leh thawhrimna zarah he chawimawina hi dawng thei ka ni a, Zoram hmun kilkhawr ber thlenga thawktu zawng zawngte hnenah lawmthu ka sawi tak meuh a ni," a ti.
National Summit-ah hian Ministry of Corporate Affairs leh Ministry of Road Transport and Highways enkawltu minister of state Harsh Malhotra chu khuallian a ni a, minister Lalrinpuii khualzahawm a ni thung.
Lalrinpuii chuan, Mizoram chu India rama CSR sum hmu tlem ber a nih a sawi a, health & nutrition lama thawhpuiah company hotute a sáwm. Minister hi Health secretary K Lalrinzuali leh National Health Mission Mizoram mission director Dr Lily Chhakchhuak ten an ṭawiawm a ni.