Bána Kaih hnuaia dilna pawm

Mizoram State Policy Coordination Committee (MSPCC) chuan an vice chairman Dr KC Lalmalsawmzauva, adviser to CM (Handholding) kaihhruaiin February 10, Thawhlehni khan Bána Kaih (Handholding) scheme thawh hnihnaa dilna lutte an thlirho a; CM Special Package dilna 372 leh loan component-a dilna 134 an pawm.

Ṭhutkhawmah hian nodal department hrang hrang aṭanga loan leh CM Special Package dilna thehluhte zirho a ni a, Bána Kaih hnuaia sorkarin a thawhpui bank-te hmalakna thlirho a ni. IDBI Bank leh Union Bank of India te nen nasa zawka thawhhona neih ni se an ti.

Tarlan danin, Bána Kaih progress partner atana thlan mi 82 hnenah February 9, 2026 thleng khan SBI-in loan Rs 7,52,09,912 an pe tawh a, Mizoram Rural Bank-in mi 260 hnenah Rs 20,61,02,150 leh Mizoram Cooperative Apex Bank-in progress partner 42 hnenah loan Rs 5,90,77,866 an pe tawh bawk.