KHAWTHLIR

Sikul tlawh

Mizoram State Commission for Protection of Child Rights (MSCPCR) hotute chuan February 10, Thawhlehni khan Khatla Primary School leh Khatla South Primary School an tlawh a; MSCPCR din chhan leh hmalakna te, naupang humhalh a ṭul dante sikul hotute an hrilhfiah. Sikul banga poster tàr tur RTE helpline (number 6009888804) leh, 'Child's Rights Information & Resource Directory' leaflet an pe bawk.

Ṭhuampui-Selesih kawng khar dawn

Aizawl Traffic SP C Vanlalvena chuan hriattirna chhuahin, PWD-in Ṭhuampui leh Selesih inkar kawng an siam dawn avangin February 10, 2026 zan dar 9 aṭanga hna thawh zawh hma chu Ṭhuampui-Selesih kawng khâr a ni dawn tih a puang.

Kângmei Ven Hapta hawng

Serchhip district bawrhsap Paul L Khuma chuan nimin khan DC Pisapui Hall-ah Kângmei Ven Hapta (Fire Prevention Week) a hawng. Hawnna inkhawmah hian nikuma kângmei vennaa thawk ṭha khaw pathum - Léng, Zote South leh Ngèntiang khawtlang hruaitute hnenah Rs 5,000 ṭheuh hlan a ni.

Samarpan Diwas

BJP, Mizoram chuan nimin khan Aizawla an pisaah 'Samarpan Diwas' an hmang. BJP state media co-convener K Vanlalruati'n Samarpan Diwas hmalakna leh a kalphungte a sawifiah a; Diwas chu Pandit Deendayal Upadhyaya hriat rengna atan a thih champhaah India ram hmun hrang hrang hman a nih thu leh, Deendayal Upadhyaya chu mihring intluktlanna ngai pawimawh em emtu a nih thu a sawi.

Anganwadi tlawh

Lawngtlai district bawrhsap Donny Lalruatsanga chuan nimin khan Lawngtlai khawpuia anganwadi centre panga a tlawh a, thawktute nen an inkawm. Anganwadi enkawltute'n an mamawh leh harsatna an lo thlen chungchangah Bawrhsap chuan theihtawp chhuahpui a tum thu a hrilh a; thawktute inpekna ropui a tih thu sawiin, hmangaihna nena thawk zel turin a fuih a ni.