ZPM hruaitute kawng siam mek an tlawh; Vairengte kawng April-ah siam zawh tum

ZPM party-a consultant C Lianlunga leh hruaitu dangte chuan nimin khan Sairang leh Vairengte inkar kawng siam mek an tlawh a; NHIDCL hnuaia kawng siamtute chuan, April 30, 2026-ah kawng siam zawh hman an tum thu an lo hrilh.

ZPM hruaitute hian NHIDCL leh an hnuaia thawk contractor pathum - Balaji, BR Goyal leh J Infratech Private Limited (Jandu) an kâwm a; kawng siamtute chuan, an hmachhawp leh an harsatna an lo hrilh rualin, April 30, 2026-ah chuan sam zawh hman an tum thu leh zawh hman ngei an inrin thu an sawi a ni.

NHIDCL project manager Saksham Tyjia chuan, "Vawiin (February 11) aṭangin Buichali aṭanga Sairang Zero Point pengṭhuam thlenga cement concrete-a chhun hna contractor Jandu-in an ṭan a, a khuar hnawh hna thawh mek a ni a, km 11 resurfacing leh bitumen concrete chûl mâm hna April 30, 2026-ah zawh tum a ni," a ti.

C Lianlunga chuan, "Kum danga fûr ruahtui tlak laia kan life-line pawimawh ber chhiat vanga harsatna kan tawh angte kuminah chuan tawh kan tum tawh lo," a ti a; kawng siamtute'n April 30, 2026-ah an siam zawh hman ngei an beiseipui thu a sawi.

Buichali leh Khamrang inkara Jandu company-in hot mix plant an bun chu Mizoram Pollution Control Board (MPCB)-in endik tawh mah se, hna thawh phalna tun thlengin an la pek loh avangin harsatna an tawh thu an lo hrilh. Hei hi ZPM Consultant chuan bawhzuiin, EFCC Minister leh MPCB Chairman hnenah phone-in a thlen nghal a ni.

ZPM tarlan danin, kawng siam mekah hian Sairang-Buichali inkar chu Jandu chan a ni a, Buichali-Khamrang chu BR Goyal kutah a awm a, Khamrang-Kawnpui chu Jandu chan a ni. Kawnpui-Kolasib leh Bilkhawthlir-Vairengte chu Balaji kutah a awm bawk.