Rinpuii'n Union WCD Minister a kâwm

Social Welfare, Women & Child Development minister Lalrinpuii chuan February 10, Thawhlehni khan Union Women & Child Development minister Annpurna Devi chu Delhi-a a pisaah a hmu a, nu leh naupang chawikanna project hrang hrang an thehluh tawhte a sawipui.

Lalrinpuii hian Annpurna Devi hnenah hian, hmun hrang hranga anganwadi centre building chhe lutuk tawh sak ṭhatna tur project an thehluh tawh thu te, hmeichhe hamṭhatna tura project kan thehluh tawh thute sawiin, project-te chu 2025-26 financial year tawp hma ngeia pe turin a ngen. Union Minister pawhin tih theih dan ang kawng a zawn dawn thu a lo hrilh a ni.

February 10 vek khan Lalrinpuii hian Ministry of Rural Development senior economic advisor Kalyani Mishra chu a pisaah a hmu bawk a, tar pension chungchanga harsatnate a sawipui.

Kalyani Mishra chuan, SNA Sparsh vanga Central-in tar pension sum an pek chhuah theih loh reng chu chinfel ṭêp tawh thu leh, SNA Sparsh a fel hnuah a rang thei ang bera pek zel tum a nih thu a sawi.