Siahaah O Dôh Ku hman a ni

Mara ṭhalaite intihhlimna kût, O Dôh Ku chu nimin khan New Siahaa Model Youth Association Multipurpose Hall-ah hman a ni a; MADC deputy chief executive member S Lalremthanga leh Akashvani (All India Radio) Mizoram director DR Lalropuia ten an hmanpui.

O Dôh Ku hi Akashvani Community Radio Service, Siaha buatsaih a ni a; Mizoram hmun hrang hranga Akashvani thawktute'n an hmanpui bakah, Siahaa Mara Thyutlia Py (MTP) branch-te'n hnam lâm leh zai chi hrang hrang an entir a ni.

Khuallian S Lalremthanga chuan, Mara kût pawimawh 'O Dôh Ku' tuai thar a ni chu a lawm thu sawiin, "Khawvel changkang zelah tih dan a inthlak zel a, pipute aṭanga ṭawng leh hnam tih dan phung an lo humhalh ṭhin chu chhunzawm zel a ṭul. Mara hnam pawimawhna leh a ṭobul bakah hnam ziarâng pawimawhna hrang hrang zirna chu MADC huam chhunga zirna-in hrang hrangah zirtir a nih theih nan hma kan la a, naupang aṭanga hnam bulpui hriat a pawimawh," a ti.

Khualzahawm DR Lalropuia chuan, khawvel hmasawn zelah hnam ziarâng vawn him a pawimawh thu leh Akashvani, Siaha hmalakna chhuanawm a tih thu a sawi a, "Mizo mipuite kan dam rei lo hi a veiawm a, hriselna lam kan ngaih pawimawh deuh deuh a ṭul," a ti a; information technology ṭhang chak tak karah radio pawimawhna a la ngai reng thu a sawi.