Minister-in Horticulture hmalakna a tlawh

Horticulture minister C Lalsawivunga chuan nimin khan Kolasib district-a Horticulture department hmalaknate a tlawh a; kut hnathawktute hmasawnna tur leh thar chhuah tihpun kawngah sorkarin a ṭul angin hma a la zel dawn tih a sawi.

C Lalsawivunga chuan, Horticulture department hmalakna hrang hrang a hmuhte chu ṭha a tih thu a sawi a, "Thawktute inpekna a fakawm. Kolasib district hi leilung hausakna leh thlai thar chhuah kawngah theihna sang tak nei a ni a, sorkar pawhin kut hnathawktute hmasawnna tur leh thar chhuah tihpun kawngah a ṭul ang angin hma a la zel dawn," a ti a; tun aia nasa lehzuala ṭan la thar turin kut hnathawktute a fuih.

Horticulture Minister hian chawhmaah Thingdawla Horticulture pisa, Ginger Collection Centre leh Centre of Excellence te, Darnam Zau (Kawnpui)-a balhla chinna hmunte a tlawh a; Kolasib Project Veng - Tuichhuahen Zau-a Improvement of Link Road hnuia hmalaknate a enfiah bawk.

Minister hi Kolasib bialtu MLA Lalfamkima, Horticulture director CH Lalmuanpuia, deputy director Manthanga Tochhawng leh hotu dangte'n an ṭawiawm a ni.