MSCPCR-in Delhi-ah mamawh an thlen

Mizoram State Commission for Protection of Child Rights (MSCPCR) hotute chuan February 10, Thawhlehni khan New Delhi-a National Commission for Protection of Child Rights (NCPCR) an tlawh a, NCPCR hotute nen inkâwmin, mamawhte an thlen.

MSCPCR hi chairperson Jimmy Laltlanmawia, member Darṭhakunga leh superintendent Lallianzuala Chawngthak te hi NCPCR member secretary Dr Sanjeev Kumar Sharma leh thawktute'n an lo dawngsawng a ni.

Inkawmhonaah Mizoram mamawhte leh Mizorama naupangte himna leh hmasawn-na turte sawiho a ni a; Mizoram aṭanga ṭul leh mamawh an thlente a theih ang anga tihhlawhtlin a nih theih nan thûk zawka thawhhona turte sawiho a ni bawk. National level-a rualkhai zawka kal theihna tur atana rawtna an thlente chu NCPCR hotute chuan an bawhzui nghal tur thu an sawi.

MSCPCR hotute hian nimin khan Delhi State Commission for Protection of Protection of Child Rights (DSCPCR) pisa an tlawh a, hotute nen inkâwmin, a ṭulna huna thawkho tur leh information inpek tawn kawngah thawhho a nih theih nan theihtawp chhuah tlan ni se, an ti a; a ṭul anga intlawh tawna inzir tawn ṭhin ni se an ti bawk.

MSCPCR hotute hian vawiin hian Punjab State Commission for Protection of Child Rights tlawh dawn a; naktuk Zirtawpni-ah Delhi-a District Child Protection Units, Juvenile Justice Board leh Child Welfare Committee te an tlawh bawk ang.