KHAWTHLIR

Phone bo pe lêt

Aizawl Police Station-in January 2026 aṭanga Central Equipment Identity Register (CEIR) hmanga mobile phone bo an hmuh let 49 chu nimin khan a neitute hnenah hlan a ni. Aizawl PS hian May 2025 aṭanga nimin thleng khan CEIR hmangin mobile phone bo 332 an hmu lêt tawh a, a vaiin Rs 43,16,000 vel hûa chhût a ni.

NQAS-a tlin lawm

Kulikawn Sub-Divisional Hospital chuan India rama sorkar damdawi-in ṭha tehna, National Quality Assurance Standards centification an hmuh thar chu February 11, Nilaini khan Health Workers Training School conference hall-ah an lawm a, bialtu MLA Lalchhuanthanga'n a hmanpui. Inkhawmah hian damdawi-ina thawkte bakah, Kulikawn West khawtlang hruaitu, pawl hrang hrang hruaitute an tel a ni.

I kawtkaiah sorkar

Lunglei Bawrhsap bultumin February 10, Thawhlehni khan Thingfalah mipuite'n awlsam zawka sorkar an dawr theihna tura department leh bank-te inpho chhuahna 'I kawtkaiah sorkar' (Prashasan Gaon Ki Ore) thawh thumna buatsaih a ni a; Thingfal leh a chhehvel khaw mi ui 635-in an dawr a ni.

Vawk vulh inzirtir

State Institute of Rural Development & Panchayati Raj leh College of Veterinary Science & Animal Husbandry chuan Thingsulthliaha SIRDPR Extention Training Centre-ah vawk enkawl dan, natna laka ven dan leh bvawk damlo enkawl dan inzirtirna an buatsaih. Training hi February 11, Nilaini khan ṭan niin, mi 30 an tel a, vawiinah zawh a ni ang.

Centenary lawm

Thenzawla zirna-in hmasa ber Thenzawl Primary School-I chuan nimin khan an kum 100 tlin an lawm a, tlaiah centenary ruai an ṭheh. Thenzawl P/S-I hi kum 1926-ah din a ni a, tunah hian zirlai 15 leh zirtirtu panga an awm a ni.

Kawng khâr a ni dawn

Traffic SP C Vanlal-vena chuan, February 14, Inrinni zing dar 6-10 inkarah Rajiv Gandhi Stadium aṭangin Aizawl International Half Marathon buatsaih a nih dawn avangin, Aizawl Bypass Road-a Chite lei leh Trinity Hospital inkarah lirthei tlân khap a nih thu a tarlang. Kawng khâr hun chu AIHM tlan dan azirin a danglam theih thu a tarlang nghal. Kawngpui dunga lirthei chhia dah neitute chu senghawi vek turin a hriattir bawk.

ICFAI-in chawimawi

ICFAI University, Mizoram chuan February 11, Nilaini khan an campus-a NJY Auditorium-ah B Vanlalzari chawimawina hun an hmang. B Vanlalzari hi kum 1975-a Mizoram IGP kah hlum kaihhnawihah man niin, Mizoram chhung bakah Tezpur Jail-ah hun eng emaw chen a tâng a ni. ICFAI University-in B Vanlalzari an chawimawina inkhawmah hian MLA Dr R Lalthangliana pawh a tel a ni.

Vawk lak luh phal

Kolasib bawrhsap Robert C Lalhmangaiha chuan hriattirna chhuahin, Koalsib district-ah vawk pùl hri, African Swine Fever léngin a ziaawm tawh avangin vawk ASF negative certificate (RAgT/RT-PCR) neite chu state/district pawn aṭanga vawk lak luh phalsak a nih thu a tarlang.

Lalrinpuii chhuang

ZPM Southern Headquarters, Lunglei chuan thuchhuah siamin, minister Lalrinpuii hnena a hnathawh ṭhat vanga Achievers' World leh Achiever Indian Forum aṭanga chawimawina, 'Women Icon Award 2026' a dawng chu ropui an tih thu leh an chhuan thu an tarlang a, "Kan lawmpui tak zet a ni," an ti.