Man man zawk leh hrisel zawka Thlai leh thei sâwngbâwl dan zir

Science, Technology and Innovation Hub (STI Hub) Mizoram chuan nimin khan Vaivakawn Cultural Centre-ah Aizawla anganwadi-a thawkte tan ei leh in man tlawm leh hrisel zawk siam chhuak tura thlai leh thei sawngbawl dan zirtirna, ‘Hands-on training on value-added food products’ an buatsaih a, Rural Development minister Prof Lalnilawma'n a hmanpui.

Prof. Lalnilawma chuan STI Hub chu tribal-te tana eizawnna awlsam leh ṭha zawk zawn chhuahna tura duan a nih thu a sawi a, "STI Hub hnuaia ITLIVES project kaltlangin kan rama thar thlai leh thei te hmanga ei leh in man man zawk, hlu zawk leh hrisel zawk siam dan inzirtirna neih ṭhin a ni. Anganwadi-a thawkte chu nu-in nau a pai lai aṭanga nu leh nau enkawltu pawimawh tak an ni a, Mizorama ṭhalai hrisel leh thluak tha tak tak chher chhuaktu an ni," a ti.

RD Minister hian value-added food product 12 siam dan ziahna lehkhabu (recipe book) ‘Value-added food product for income generation’ tih a tlangzarh nghal a ni.

STI Hub Mizoram hi Mizoram University leh Amrita University, Kerala ten an enkawl a; programme pali - Digital Literacy & Adolescent Awareness Ambassador, Ayurveda and Health, Food & Nutrition leh Agro-Forestry hnuaiah Aizawl leh Serchhip district-a tribal-te zirtir leh tihhmasawn hna an thawk a ni.

Kum 2023-a bul ṭan a nih aṭanga nimin thlengin Aizawl leh Serchhip district hmun hrang hrangah vawi 239 training an buatsaih tawh a, direct benefi-ciary mi 8,510 an awm tawh a ni.