April thla aṭangin chhiarpui ṭan dawn

Mizoramah April 1, 2026 aṭangin chhiarpui (Census 2027) buatsaih ṭan a ni dawn a; nimin khan Aizawl DC Pisapui Hall-ah chhiarpui atan inbuatsaihna hun hman a ni.

Chhiarpui 2027 hi chi hnih a awm dawn. In awm zat dinhmun leh a chhunga thil awmte chhinchhiahna, House Listing and Housing Census (Housing condition, amenities, assets and facilities) chu April 16 - May 15, 2026 chhungin neih a ni dawn a; mimal chanchin leh khawsak dan dinhmun chhiarna, Population Enumeration (Individual level demographic, social and economic) chu April 1-15, 2026 chhungin neih a ni ang.

Directorate of Census Operations bultumin nimin khan Aizawl DC Pisapui Hall-ah Aizawl Municipal Corporation (AMC) leh Serchhip district chhunga chhiarpui neitu tur district leh charge level officer leh official-te tan training buatsaih a ni. Training hi Aizawl DC Lalhriatpuia, Aizawl district principal census officer ni bawkin a kaihruai a; Directorate of Census Operation-a mi Shivam Gupta leh Melody Lalnunsangi ten thil pawimawhte an zirtir a ni.

India rama chhiarpui hmasa ber chu kum 1872-ah neih a ni a, tuna chhiarpui neih tur (Census 2027) hi India rama chhiarpui vawi 16-na leh, ramin zalenna a hmuh hnua chhiarpui vawi 8-na a ni.