Khualzin tan bika siam rêl rawn thleng

Tourism department leh Indian Railway Catering and Tourism Corporation ten August 2025-a thawh dunna thuthlung an ziah tawh angin, nimin khan Sairang rel chawlhhmunah tourist-te tana a bik taka siam rél (Bharat Gaurav Train) a thleng a, 'North East Discovery Tour' hnuaia India hmarchhak fang mek khualzin 81 an rawn thleng.

North East Discovery Tour hmanga Mizoram rawn tlawhtute hi Sairang rel chawlhhmunah Tourism department hotute'n an lo hmuak a, USA leh Nepal ram mite an ni. Nimin vek khan Aizawl leh a chhehvel an fang a, nizan khan Dimapur (Nagaland) lam panin an chhuak leh a ni.

An zinkawng hi Delhi aṭanga ṭanin February 3, 2026 khan an chhuak a, Manipur tih loh chu India hmarchhak state zawng zawng an tlawh dawn a, February 18, 2026-ah Delhi-ah an lêt ang.

Bharat Gaurav Train hi khualzinte tana siam bik niin, mi 150 a phur thei a, a chhungah restaurant pahnih leh spa a awm. Kum khatah vawi khat India hmarchhak tan bik Indian Railway Catering and Tourism Corporation hian tour package an siam ṭhin a, a duh apiang tan a tel theih a ni.