State Day of Prayer hman a ni leh dawn; Aizawlah Hnehna Kawngzawh tum a ni

State Day of Prayer Committee (SDPC) hruaitute chuan nimin khan Aizawl Press Club-ah thuthar thehdarhtute an kâwm a; State Day - February 20-ah State Day of Prayer buatsaih leh a nih dawn thu sawiin, "February 20, 2026-ah Aizawl khawpuiah ke leh two wheeler hnehna kawngzawh neih tum a ni," an ti.

SDPC hruaitute chuan, Mizoramah harhna a thlen theih nan leh Mizoramin Pathian malsawmna a dawn theih nan State Day of Prayer buatsaih leh tum a nih thu sawiin, "Kumin hian thupui atan 'I din thar leh ang u' (Nehemia 2:17) tih hman a ni dawn," an ti a; district khawpui tin bakah, khaw dang eng emaw zat leh, state pawn leh India ram páwnahte pawh hman a nih dawn thu an sawi.

State Day of Prayer chu sorkar emaw, political party emaw bikin an buatsaih a nih loh thu sawiin SDPC hruaitute chuan, "Kohhran hrang hrang intêl khawmin kan ram tan leh hnam tana a huhoa Pathian kan auhna atana buatsaih a ni. Ṭawngṭaiho hunah phei chuan tlawmngai pawl hrang hrangte pawh an rawn tel dawn. Kum tin a ropui thei ang bera buatsaih zel kan duh," an ti.

SDPC hruaitute chuan, State Day of Prayer pian chhuah dan sawiin, "Kan ram tana ṭawngṭai ṭhin pawl hrang hrang aṭanga mi ṭhahnemngaite'n a sawia sawiho mai duhtawk loin, February 2, 2024 khan an inhmukhawm a, ram pum huap sual thupha chawi ṭawngṭaiho ṭulin an hria a ni," an ti a, inhmuhkhawmnaah ram hruaitute leh mi dang eng emaw zan an tel thu an sawi.

Chief Minister hnenah an thu leh hla thlen tura an lên thu sawiin SDPC hruaitute chuan, "Ani chuan kan ngennate chu lo ngai pawimawhin, hma la tura committee din ṭha a tihpui. A hun atana ruahman February 20 chu State Day a nih avangin a hming atan State Day of Prayer ni se, tih a ni a, a vawi khat nan February 20, 2024 khan Lammualah hman a ni," an ti.

Zawhna chhangin SDPC hruaitute chuan, ZPM sorkar hnua hman ṭan ni mah se, ZPM sorkar loh hnuah pawh hman chhunzawm zel an duh thu an sawi a, "Nikum lamah Council of Churhes in Mizoram bultuma hman kan duh a, anni lam an la in form mumal loh avangin mawhphurhna kan keng chhunzawm. Committee chuan hman chhunzawm zel kan duh," an ti a, Pathianni ang maia hman chhoh theih ni se an duh thu an sawi bawk.

STATE DAY OF PRAYER - AIZAWL

▶ February 16-19 chhung chhun lamah ṭawngṭaiho tur a ni.

▶ February 18 leh 19 zan dar 8 aṭanga a tuk zing dar 6 thlengin ṭawngṭaiho tur a ni a, fakna leh chawimawina (praise & worship) hun a awm ang.

▶ February 20-ah Sikulpuikawn, Vaivakawn leh Bethel Lung (Chaltlang) aṭangin Hnehna kawngzawh neih tur a ni a, Lammualah chhun dar 12 aṭangin hun hman a ni ang.