Zawlnuamah sangha ṭín siamna hawng
Zawlnuam khuaa sangha ṭín siamna chu nimin khan Cooperation minister PC Vanlalruata'n a hawng a; India hmar-chhak biala sangha ṭin siamna hmasa ber a nih thu sorkar thuchhuahin a tarlang.
Sangha ṭin siamna hi Zawlnuam Fishery Cooperation Society Ltd.-in an din a ni. Vawi khatah sangha ṭîn kg 50 siam theih niin, chu chu ṭîn 120 a ni a, ṭîn 120 siam chhuak turin darkar 2 chhung hun hman a ngai.
Sangha ṭîn siamna khawl an neih theih nan July 2024-ah Cooperation department-in sorkar laipuiah a thlensak a, Integrated Cooperative Development Project kaltlangin cheng nuai 65 hmuh a ni. Khawl lei nan cheng nuai 40 hman a ni a, khawl bunna in sak nan nuai 25 hman a ni thung.
Cooperation Minister chuan, Zawlnuama sangha ṭîn siamna bun a ni ta chu Mizoram tan méllung thar, ro tling tak tur a nih thu a sawi a, "A buatsaihtu Society leh Department-te thawhrimna leh hmalakna a fakawm. Sangha thar chhuah kan hralh lehnaah nasa takin kut hnathawktute a pui dawn a ni," a ti.
PC Vanlalruata chuan, sangha ṭîn siamtute chu ei leh in siamtu an nih avangin fimkhur turin a chah a, "Mipuite'n an duh tur ngeia siam tura kan inbuatsaih a ṭul dawn. Industry hlawhtlinna ber chu min dawrtu mipui mit tlun a ni a, mipui duh zawng kan siam em tih ngaihtuah nachang hriat a pawimawh," a ti a; sangha ṭîn siamna hmunhma leh hmalak zelna turah sorkarin theihtawp chhuah a inhuam thu a sawi.
Agriculture minister ni bawk Vanlalruata chuan, Mizoram sorkarin kut hnathawktute thlavâng a hauh na hle tih sawiin, "Khawthlang mipui tan kuhva sawngbawlna tur Zamuangah buatsaih mek a ni a, Mamit district-ah nasa zawka oil palm chin tuma hmalak mek a ni. Kut hnathawktute hmasawnna atana an mamawh ber an thlai thar hralhna sorkarin a ngaih pawimawh ber a nih avangin sawhthing leina kawngah ruahmanna felfai tak siama a lei mek a ni," a ti.
Bialtu MLA Robert Romawia Royte pawhin thu sawiin, Hachhek bialah sangha ṭîn siamna an nei ta chu lawmawm a tih thu a sawi a; Zawlnuam Fishery Cooperation Society hnuaia sangha dil neite chu tam zawk leh hlâwk zawka thar tuma inbuatsaih turin a chah a ni.