Minister-te'n lawmpuina an hlan

Minister C Lalsawivunga leh minister of state Lalnghinglova Hmar te chuan nimin khan an pisaah an bial chhung mi, Mizoram Civil Services (Combined Competitive) Examinations 2025-a tlingte leh zirlai hlawhtlingte hnenah lawmpuina an hlan.

C Lalsawivunga chuan, a bial Aizawl South-I chhunga a auhla pakhat chu 'UPSC leh civil service dangah a tam thei ang ber tlin' a nih thu leh ṭhenkhat phei chu an tlin ngei theih nan a sponsor thu a sawi a; kumina MPSC exam-a a biala mi tlingte chu Mizoram tan hna ṭha taka thawk a, officer chhuanawm tak ni turin a fuih a, "A pawimawh ber chu Pathian ṭihna leh rinawmna a ni. Rinawmnaah rau rauah Pathian laka rinawm a pawimawh ber," a ti.

Lalnghinglova Hmar chuan, Aizawl West-II aṭangin civil service exam-a hlawhtling leh zirlai hlawhtling lawmpui tur an nei zel chu khawtlang tana hlu a nih thu a sawi a, "A hminga bialtu MLA nih pawh a tinuam hle. In kalna line-ah ṭheuh hna thiam tak nih tum ula, hei hian in kal zelnaah thui tak a nghawng dawn a ni," a ti a; hna thiam leh mi felte mipuiin an hriat reng ṭhin thu a sawi.

Minister C Lalsawivunga hian Aizawl South-I chhunga mi MPSC Competitive Exam 2025-a tling pali - Lalrammuani Hnamte, Bethlehem Vengthlang (MCS), Andrew Hmingsangbera, Bethlehem Veng (MPS), Lalthlamuana, Bethlehem Vengthlang (MPS) leh, Ruthi Vanlalmuani, College Veng (MIS) te hnenah laptop a hlan a ni.

MoS Lalnghinglova Hmar chuan MPS-a tling thar KD Lalthiamsama, Tuikual South leh Lalchhanhima, Tuikual North leh MIS-a tling John Hualhmingthanga, Dinthar te hnenah Rs 20,000 a hlan a; Mizoram University hnuaia Bachelor of Vocation (Interior Design)-a pathumna Lalṭhatluangi, Dawrpui Vengthar hnenah Rs 10,000 a hlan a ni.