KHAWTHLIR

Zirlaite'n thisen pe

Academy of Integrated Christian Studies (AICS) chuan nimin khan Civil Hospital, Aizawl tan thisen unit 69 an pe a, petute mipa 58 leh hmeichhia 11 an ni. JB College pawhin Lunglei Civil Hospital tan thisen unit 83 an pe a, petute mipa 66 leh hmeichhia 17 an ni. Serchhip DIET zirlai hmeichhie 21 leh mipa 13 ten Valentine's Day pualin nimin khan Serchhip District Hospital tan thisen unit 34 an pe bawk.

Pisa kai hun

Mizoram sorkar chuan February 16, 2026 aṭanga October 2, 2026 chhunga sorkar pisa kai hun a bituk thar. Pisa kai hun hi Mizoram leh hmarchhak state-a Mizoram House-ah chuan zing dar 9 aṭanga tlai dar 5 thleng a ni dawn a; hmarchhak state ni lo khawpui danga Mizoram House-ah chuan zing dar 9:30 aṭanga tlai dar 5:30 thleng a ni ang.

CADS ruihhlo man

Central YMA hnuaia ruihhlo dotu, Central Anti-Drugs Squad (CADS) chuan January 7-13, 2026 chhung khan heroin (no 4) hawng 13 leh Tictac bur 47 an man a; ganja gram 352, Alprazolam báwm 10, NAP báwm ruk leh Zolpidem báwm hnih an man bawk. Ruihhlo kaihhnawihah mi 44 an man a, an zinga mi pasarih chu Excise & Narcotics hnenah pek niin, mi pakhat chu home-ah dah luh a ni.

Online-a consent dilna hawn a ni

Central Pollution Control Board chuan Mizorama hman turin Unified Consent & Authorization Management System (UCAMS) portal a siam thar a, mipui hman theih turin nimin khan hawn a ni. Industry din thar tur leh consent mamawh tan UCAMS portal aṭangin dil theih a ni a, Mizoram Pollutoin Control Board pisaa kal kher ngai loin online-in dilna thehluh theih a ni tawh dawn a ni. Consent fee pawh online-in pêk theih a ni bawk.