Free clinic-ah mi 2,668 inentir

Indian Medical Association (IMA) Mizoram State Branch, Mizoram Government Doctors Association, Indian Dental Association leh ZMC Faculty Doctors Association te chuan nimin khan Tlabungah Multi-Speciality Clinic an buatsaih a, mi 2,668 an inentir.

Multi-Speciality Clinic hun hman tur hian doctor 56 leh anmahni puitu mi 17, an zavaiin mi 73 an thawk chhuak a, department hrang 15-ah harsatna neite râwn theih turin doctor an ṭhu. Zing dar 7 aṭanga chawhnu dar 2 thlengin khaw 20 vel aṭangin mi 2,668 an inentir hman a ni. A thlawna damdawi sem tur lei nan bialtu MLA Prova Chakma chuan MLA fund aṭangin Rs 2,00,000 a thawh.

IMA Mizoram State Branch hruaitute chuan, damdawi-in changtlung zawk pan thei lo thingtlang hmun kilkhawr zawka mite tan multispeciality clinic an buatsaih ṭhin a, Tlabunga an buatsaih chu vawi 13-na a nih thu an sawi.