Khawtlang tana thil lian tham a thlen dawnin a kalhmang tur mipui hriat a ṭul - Chhanzova

Armed Veng khawtlangin an nghahlelh em em Armed Veng Kawrpui (Chanmari lui) siamṭhat hna thawh dan tur leh a kalhmangte inhrilh hriatna hun bialtu MLA B Lalchhanzova, minister of state bultumin February 13, Zirtawpni zan khan Armed Veng Community Centre-ah buatsaih a ni. B Lalchhanzova chuan khawtlang tana thil lian tham a thlen dawnin, a kalhmang tur khawtlang mipuiin an hriat a ṭul thu a sawi.

B Lalchhanzova chuan an hun buatsaih ang chu veng dangte pawhin entawn se a duh thu sawiin, "Khawtlang mipuite hian kan khawtlang tana thil lian tham thleng tur hi a tihdan tur, a kalhmang tur hria se ka duh a ni. A project a chhuah tlai deuh avangin, furpui thlen hmaa an thawh theih chin chin contractor-te'n ṭha takin an thawh a ṭul. Veng mipuite mamawhna hriaiin, chhunah chauh ni lo, zing aṭanga thawkin, zanah pawh a thawh theih chin an thawk mai turah ka ngai," a ti.

Hna a hmanhmawhthlak avanga uluk loh tur tihna a nih loh thu sawiin Aizawl East-II Bialtu MLA chuan, "Muang chan loh kan duh thung. He kawr siamṭha tur hian hun hmasa lamah theihtawp chhuah a ni tawh tih kan hria a, keini pawhin theihtawp kan chhuah chhunzawm a ni. Kan awm reng dawn loa, lokal lehzel turte pawhin theihtawp an chhuah chhunzawm zel ang," a ti a, Armed Veng khawtlang mipuite chu contractor-te harsatna siam loh kawngah theihtawp chhuah turin a ngen.

B Lalchhanzova chuan hmasawnna hnathawh a nih dawnin khawtlang mipuite nen sawihona mumal a awm ngai loh thu sawiin, "Khawtlang mipuite telve lohna, thlim an nihna hnathawh chu a zuihral duh. Contractor-te kan ringlel lam a ni loa, khawtlang mipuite'n an hriat tur hreve se kan duh a ni. Mipuite nena thawhhona ṭha ka duh a, ka phak tawkah theihtawp kan chhuah. Enghelh deuhte kan nei a nih pawhin ralkhat aṭanga inep mai loin, in hrilh hre zel ang u. Ṭawngṭaina nen ṭha taka hna thawh a nih theihna atan ṭan tlan a ṭul thu a sawi.

He hunah hian bialtu corporator Christina Roluahpuii Sailo leh Armed Veng Local Council chairman K Lalfakzualate pawhin thu an sawi. A nodal department UDPA-in consultant atana an rawihte chuan hnathawh dan tur leh a kalhmang hrang hrangte an sawifiah a, contractor lamin an hnathawh tawh chin leh an inbuatsaih chhoh zel dan an sawifiah thung. Armed Veng khawtlang hruaitute leh mipui kalkhawmte chuan hriatfiah duh an neihte chu Bialtu MLA, consultant leh contractor-te'n an chhang a ni.

Armed Veng Kawrpui siamṭhat hna hi UDPA-in SASCI sum hmanga district khawpui himna leh mawina atana cheng vbc 104.28 senga tui luankawr siam tur (Storm Drain Projects) hnuaia thawh a ni. Storm Drain Projects hnuaiah hian district hrang hrangah tui luankar siamṭhat hna thawh mek a ni a, Aizawl bikah chuan hmun 26 ah cheng vbc 61.76 sengin, tui luankawr km 8.136 siamṭhat a ni dawn.