Aizawl International Half Marathon neih a ni

16th February, 2026

Governor Gen. Vijay Kumar Singh chuan February 14, Inrinni khan Rajiv Gandhi Stadium, Mualpuiah Sports & Youth Services depart-ment, Innovations India leh Athletics Association of Mizoram ṭangkawp buatsaih 2nd Aizawl International Half Mara-thon (AIHM) a hmanpui a; AIHM chu khawvel pum ang pawha marathon hriat hlawh leh ngaihven a nih ngei a beisei thu a sawi.

Larsap Gen. VK Singh chuan, hlawhtling taka Aizawl International Half Marathon vawi 2-na buatsaih a ni chu lawmawm a tih thu a sawi a, "India ram hmun hrang hrang bakah ram dang aṭanga rawn tel eng emaw zat an awm a, an fakawm tak zet. Hei hian AIHM hi khawvel huap a nih zia a lantir a, a ṭhan chak zia leh khawvel ang pawha hriat a hlawh zia a lantir," a ti a, AIHM chu khawvel pum ang pawha marathon hriat hlawh leh ngaihven a nih ngei a beisei thu a sawi.

AIHM chu Mizoram mawina leh boruak thianghlim phochhuahna hun remchang a nih thu leh Mizoram pawn aṭanga lokalte chu khualṭha an nih thu sawiin Larsap chuan, nakkum lamah pawh an ṭhian te, chhungte leh infiammi dangte nen marathon tlan tur chauh ni lo, Mizoram belchiang tura lokal leh ngei turin a sawm nghal a ni.

AIHM, 2026 patron ni bawk Gen VV Singh chuan, marathon chu ni khat thil thu atan mai ni lo, nakin zel atan pawha nun kaihruaitu ni se a duh thu a sawi a; Mizoram ṭhalaite'n nun kawng leh taksa hrisel an neih theih nana fuih phurtu a nih ngei a beisei thu leh India ram pum ang pawha taksa leh rilru hrisel neih pawimawh zia entirna a nih ngei a beisei thu a sawi bawk.

Sports & Youth Services minister Lalnghinglova Hmar pawhin thu sawiin, Aizawl International Half Marathon hvawi 2-na hluta tel zawng zawngte fakawm a tih thu a sawi a; "AIHM chu a kum têla a pui chho zel. Nakkumah pawh kumin aia ropui leh changtlung zawka buatsaih tum a ni," a ti.

AIHM puala inkhawmah hian Environment, Forest & Climate Change minister Lalthansanga, Health & Family Welfare minister Lalrinpuii, MLA Lt Col Clement Lalhmingthanga, AIHM curator Captain Rahul Bali leh official dangte an tel a ni.