Minister-in AONEI Annual Conference hmanpui

India hmarchhaka cancer veite enkawl kawnga thiamna bik nei doctor rual inzawmkhawm pawl, Association of Oncologists of Northeast India (AONEI) chuan February 13-15, 2026 khan Aijal Club-ah Annual Conference vawi 21-na an nei a; Health & Family Welfare minister Lalrinpuii'n February 14, Inrinni khan hmanpuiin, Mizoram leh hmarchhak state-te chu chawkawng, chuap, hnute leh chhùl hmawr cancer hluarna hmun a nih thu a sawi.

Lalrinpuii chuan, Mizoram chu India rama cancer vei tamna hmun a nih thu a sawi a, "National Cancer Registry Programme hnuaia report hrang hranga tarlan a nih danin, Mizoram leh hmarchhak state-te chu chawkawng cancer, chuap, hnute leh chhul hmawr cancer hluarna hmun a ni a, hetiang a nih mek laia India rama cancer doctor rualte intawhkhawmna hun Mizoramin a thleng hi cancer dona kawnga thil lawmawm tak a ni," a ti.

Mizorama damlo leh a bik takin cancer natna veite tan AONEI inkhawmpui chuan rah duhawm tak chhuah ngei se a duh thu sawiin Health Minister, "Mizorama cancer hluar lutuk tihziaawmna turin theihtawpin hmalak a ni a, Mizoram sorkar leh JICA ṭangdunin Zemabawkah Mizoram State Super-Specialty Cancer & Research Centre kan din turah hna thawh ṭan a ni tawh," a ti a; hemi hnuaiah hian cheng vbc 700 hu project, bone marrow transplant tih theihna tur te, nuclear medicine facility hrang hrang, PET scan leh cancer test-na chi hrang hrangte tih theihna tur dah a nih dawn thu a sawi.

Lalrinpuii chuan cancer lama nasa lehzuala zirchianna neih chu Mizoram tan thil pawimawh tak a nih thu a sawi a, "AONEI thil tum hrang hrang - cancer leh a enkawlna medical lama hriatna inhrilhdarhtawn te, India hmarchhaka cancer enkawlna tihchangtlun leh intluktlanna a awm theih nana hmalak te, cancer veite enkawlnaa medical line hrang hrang leh hmarchhak state hrang hrangte inkara thawhhona ṭha siamte chu Mizoram tan thil hlu tak a ni," a ti bawk.

AONEI conference hi kum tin India hmarchhak state hrang hrangah neih ṭhin a ni a, kumin hi a vawi 21-na niin, Mizoram State Cancer Institute-in a thleng. February 13 – 15, 2026 chhung khan inkhawmpui hi neih a ni a, cancer chungchang zirhona leh thupui (topic) hrang hrang sawihonate neih a ni.