V Day pualin mi 614-in thisen pe

Valentine's Day pualin February 14, Inrinni khan Mizoramah thisen pek rûnpui huaihawt a ni a, mi 614-in thisen an pe. Aizawla thisen pek rûnpuia khuallian Jeje Lalpekhlua, MLA chuan, hrisel ṭha tan thisen pek a hlauhawm loh tih hre reng turin ṭhalaite a chah.

Valentine's Day pual hian Aizawla chuan Dawrpui Multipurpose Hall-ah Blood Donation Camp hi Association for Voluntary Blood Donation (AVBD), MSACS, National Health Mission leh Civil Hospital, Aizawl ten an buatsaih a, mipa 167 leh hmeichhia 110 ten thisen unit 277 an pe. Valentine's Day pual hian ZMCH, Lunglei, Siaha, Champhai, Serchhip leh Lawngtlaiah te pawh thisen pek huaihawt a ni a, Mizoram puma thisen pek zawng zawng chu unit 614 a ni.

Jeje Lalpekhlua chuan thisen petute zahna chibai bûkin, chhuanawm a tih thu a sawi a, "Thisen pek hi a hlauhawm lo a, kei pawhin ka pe ve ṭhin a, harsatna ka la tawh phah ngai lo, infiammite tan pawh a hlauhawm lo. Mizo zingah thisen vawi tam tak pe tawh mi ṭhahnem tak an awm a, chungte chu tuna ṭhalaite hian entawn ila, mi nunna chhan turin thisen pek i uar zel ang u," a ti.

Mizote chu tlawmngai hnam an nih thu sawiin Jeje Lalpekhlua chuan, "Kan tlawmmgaihna avang hian kawng engkimah Mizo nih a nuam ṭhin. Thisen pek hi tlawmngaihna lan chhuahtirna remchang tak a ni," a ti a; thisen pe turin hrisel ṭhat a ngaih avangin, hrisel turin ei leh inah fimkhur tur leh taksa vawng uluk turin ṭhalaite a chah.

South Tuipui bialtu MLA hian thisen a pe ve nghal a; sum senso phuhrûk nan AVBD hnenah Rs 10,000 a pe.