KHAWTHLIR

Minister hlui a thi

Minister hlui ST Rualyapa (91) h/o Thansiami, Khatla chu February 14, 2026 tlai dar 6:10 khan cancer vangin Aizawl Hospital-ah a thi. Thu dawn danin, ST Rualyapa hi kum 1993 MLA inthlanpuiah Sangau bialah Congress ticket-a dingin, thlan tlin a ni a, minister of state a ni. Khatla Presbyterian Kohhranah kohhran upa a ni a, nimin chawhnu dar 1 khan Khatla Kohhran Biak-Inah vui a ni.

EFCI Hmeichhe Pawl Inkhawmpui lian

Evangelical Free Church of India (EFCI) Central Kristian Hmeichhe Pawl Inkhawmpui lian vawi 18-na chu February 13-15, 2026 chhung khan Saiphai, Kolasib Presbytery, Mizoramah neih a ni. Inkhawmpui thupui atan 'Rinna a ding nghet (1 Korinth 16:13)' hman niin, rorel palai mi 323 an tel. Term thar atanah chairperson-ah Dr Vanrammawi Pakhuongte leh secretary-ah Hannah Lalṭhahnieng te thlan an ni. Central Kristian Hmeichhe Pawlah hian member 10,373 an awm mek a ni.

Tlang zirchiang

February 14, Inrinni khan Lawngtlai bawrhsap Donny Lalruatsanga hoin Lawngtlai SP PC Lalchunglura leh official dangte Paithar tlang an zirchiang a, khawtlang hruaitute nen tlang tihhmasawn dan an sawiho. Bawrhsap chuan, "Ṭha taka Paithar tlang cheibawl a nih chuan khualzinte a hîp nasa dawn hle a, theihtawp chhuah zel a ṭul a ni," a ti.

Meizu man

Champhaiah vantlang hmuna meizuk khapna dan zawm a nih theih nan Champhai Bazarpuiah Cigarettes and Other Tobacco Products Act, 2003 tlawh chhanin special enforcement drive neih a ni a, vangtlang hmuna meizial zu mi pakhat man niin pawisa chawitir a ni. Enforcement drive hi Anti Tobacco Squad, police Legal Metrology department leh Commerce & Industry department ṭangkawp buatsaih a ni a, district chhung hmun hrang hrangah neih chhunzawm zel an tum.