Ni nga awh LESDE Kût 2026 khar a ni; Kût chhungin mi 28-in hna an hmu

Labour Employment Skill Development & Entrepreneurship (LESDE) minister Lalnghinglova Hmar hoin LESDE department-in kut hnathawktu te, thiamthil neite leh hna zawng mekte tana a buatsaih LESDE Kût 2026 chu February 14, Inrinni khan Lammualah khar a ni. Ni 5 awh LESDE Kût-ah hian stall 162 hawn niin, cheng nuai 35 man vel an inhralh a; kût chhung hian mi 28-in hna an hmu thar tih tarlan a ni.

Lalnghinglova Hmar chuan, LESDE Kût chu kut hnathawktu te, thiamthil neite leh hna zawng mekte puala buatsaih a nih thu a sawi a, "LESDE department inhmelhriattirna leh sorkar hnuaia hamṭhatna hrang hrang an dawn theihte pholanna hun a ni a, department lian ni lo mah se, central ministry panga – Labour Ministry, Skill Development & Entrepreneurship Ministry, Ministry of External Affairs leh Ministry of Corporate Affairs-te nen indawrin kan thawhko a ni," a ti.

Mizoram chuan entrepreneurship leh thiamthil zir kawngah hma a sawn thu sawiin Lalnghinglova chuan, "Hetihrual hian, thil ṭha zawk leh danglam zawk ngaihtuah chhuaka siam chhuah kan tum zel tur a ni," a ti a, LESDE Kût a hlawhtlin theih nana thawktute leh chhimtu mipuite chungah a lawmthu a sawi.

Sorkar thuchhuah tarlan danin, LESDE Kût-ah hian dawr (stall) 162 hawn niin, heng zinga 11 hi Mizoram pawn aṭanga rawn hawng an ni a; stall hrang hrangte hian cheng nuai 35 man vel an inhralh a ni. February 13, 2026 thlenga chhinchhiah dan chuan, kûtah hian kut hnathawktute leh hna zawng mek mi 234 chu sorkar scheme hrang hrang hnuaiah an inziaklut a, mi 28-in hna an hmu. LESDE hnuaia ESIC Dispensary chuan free medical check-up buatsaihin, mi 1,000 chuang hriselna dinhmun an en sak bawk.

Kût kharna inkhawmah hian LESDE secretary Lalhriatzuali Ralte leh director John Ṭanpuia te pawhin thu an sawi a; MLA H Ginzalala leh Baryl Vanneihsangi te pawh an tel.

District tina skill development leh entrepreneurship lama mi hlawhtling thlan chhuahte hnenah District Skill & Entrepreneurship Award 2025–2026 pek a nih bakah, kût chhunga category hrang hranga tiṭha zualte leh January 19-22, 2026 chhunga Guwahati-a Regional Skill Competition neih zawh taka Mizoram aṭanga medal la mi 21-te hnenah chawimawina pek a ni.